20 punëtorë të Aeroportit Ndërkombëtar të Prishtinës “Adem Jashari” janë larguar nga puna gjatë së martës dhe së mërkurës.
Në mesin e tyre është edhe edhe kryetari i Sindikatës së Punëtorëve të Aeroportit, Bashkim Latifi.
Latifi për Kohën ka thënë se largimet nga puna janë të montuara dhe që të gjitha vijnë si pasojë e grevave që punëtorët e aeroportit kanë pasur vazhdimisht për shkak të pakënaqësisë.
Ndërkaq, në vendimin e menaxhmentit të Aeroportit thuhet se Latifi është larguar për shkak të shkeljeve të lehta dhe të rënda disiplinore.
“Bashkim Latifi punonjës i LIMAK Kosova në pozitën operator në XRay, i ndërpritet kontrata e punës pa periudhën e njoftimit për kryerje të shkeljeve të lehta disiplinore – duke e lënë vendin e punës të pambikëqyrur, pa arsye gjatë orarit të rregullt të punës, neglizhim të detyrave që reflektojnë në performancën e punës dhe dështimi për të zbatuar udhëzimet e punës të dhënë nga drejtori, ka kryer shkelje të rëndë disiplinore – dështim në kryerjen e detyrave të punës, performaca e dobët në nivelin sasior dhe cilësor si dhe vepra të tjera të përcaktuara me Ligjin e Punës, Rregulloren e Personelit dhe kontratën e punës të procedurës disiplinore…”, thuhet në vendim./Insajderi.com
