Është kërcënuar me jetë gazetari i KTV-së, Kushtrim Kadriu nga kunati i Mihrije Berishës, Miftar Berisha.
Pas raportimit të Kohavisionit se Mihrije Berisha ka ushtruar padi në Gjykatën Themelore të Suharekës ndaj Miftar Berishës dhe 7 personave të tjerë, ai ka kërcënuar gazetarin se nëse raporton sërish për këtë rast, ai duhet ta ruajë kokën e vet. Kërcënimi nga Miftar Berisha është paraqitur në Polici.
Policia e Kosovës ka konfirmuar se rastin e kanosjes ndaj gazetarit, njësia e hetimeve është duke e hetuar në konsultim me Prokurorin e Shtetit.
KTV-ja e ka kontaktuar, nëpërmjet telefonit, Miftar Berishën, i cili jeton në Francë.
Ai ka thënë se nuk do të lejojë që sërish të etiketohet emri i tij, pavarësisht se padinë ndaj tij dhe 7 anëtarëve të tjerë të familjes e kishte bërë kunata e tij, Mihrije Berisha, përmes avokatit Naim Qelaj.
Ndërsa, vëllai i Miftar Berishës, Eqremi, i cili jeton në Suharekë, ka thënë se përgjegjësinë për këto deklarata e merr vetë ai, duke premtuar se ai do të kërkojë falje publike në seancën që do të mbahet më 18 shtator.
