Ministri i Infrastrukturës, Arban Abrashi, i cili ka qenë pjesë e delegacionit të Kosovës në Uashington, ka thënë se takimi ishte historik edhe për faktin se atje Kosova u njoh nga Izraeli, njofton Insajderi.
Abrashi tutje ka theksuar se “qëllimi i Shtëpisë së Bardhë është që të zhvillojë ekonominë në Ballkan në mënyrë që njerëzit më të mos flasin për politikë”.
Ai ka thënë se “pala kosovare dhe ajo serbe në ShBA kanë propozuar projekte ekonomike derisa thotë se temat politike në tavolinë janë vendosur nga Amerika”.
“Pjesa politike, strategjike dhe ajo që lidhet me siguri u vendosën në tavolinë nga SHBA. Na është kërkuar të ruajmë diskrecionin ashtu siç ndodh zakonisht në këto takime”, është shprehur Abrashi, për Telegrafin.
Abrashi thotë Kosova ka përfituar nga marrëveshja ekonomike në Uashington në disa drejtime.
“Ne me këto projekte ekonomike lidhemi shumë më shpejt me rrugë Evropiane. Ne pos që kemi qasje në këto rrugë do të jemi edhe nyje rajonale”.
Ministri i Infrastrukturës thotë se me autostrada përfiton edhe Serbia pasi del në Adriatik, por sipas tij përfitues më i madh do të jetë Kosova.
“Serbia e ka infrastrukturën shumë të zhvilluar. Tash lojtarë rajonal me këto marrëveshje bëhemi ne”.
Abrashi thotë se vetëm një javë pas marrëveshjes, Kosova ka pranuar letra nga organizata financiare të Amerikës për financimin e autostradave.
“Shpresojmë se së shpejti do të vijnë edhe letra tjera për mbështetjen e projekteve financiare”, tha ndër të tjera Arban Abrashi./Insajderi.com
