Pas një paralajmërimi nga anëtarja e Lëvizjes Vetëvendosje, Arbërie Nagavci, në lidhje me shkuarjen në zgjedhje nëse nuk merren vesh me Lidhjen Demokratike të Kosovës, një reagim i menjëhershëm ka ardhur nga zyrtarja e LDK-së, Hykmete Bajrami, shkruan Gazeta Insajderi.
Madje Bajrami, i është përgjigjur ashpër Nagavcit, duke i thënë se LDK-në, nuk mund ta kushtëzojë askush që mos ta propozojë Presidentin.
“Propagandën dhe luftën speciale duhet ta ndalë Vetëvendosje nëse njëmend ka vendosur të ndërtojë koalicion me Lidhjen Demokratike të Kosovës. LDK po punon për ndërtimin e një Qeverie që do të ofrojë zgjidhje për secilin problem të qytetarëve. E jo Qeveri e cila rrëzohet pas një viti. Qeveri e cila nuk e përfundon mandatin”, ka thënë ndër të tjera Bajrami.
Hykmete Bajrami, u ka bërë thirrje VV-së, që t’i lë deklaratat e të merren vesh para se të prishet çdo urë bashkëpunimi.
“Kushtëzimi i Vetëvendosjes se nuk e pranojmë Presidentin nga LDK-ja është i papranueshëm. Kushtëzime të tilla s’mund të vendosin partitë që s’kanë fituar 51 për qind të votave”, është shprehur ajo.
Ajo, në një postim në rrjetin social Facebook, ka shkruar në lidhje me marrëveshjen me Lidhjen Demokratike të Kosovës. Por ka theksuar se partia e saj është e interesuar në gjetjen e një kandidati ose kandidateje të denjë, konsensuale e që paraqet unitetin e popullit.
Nagavci, ka bërë të ditur se në interes të arritjes së marrëveshjes së bashkëpunimit me LDK-në, ata janë pajtuar që të propozojnë për kryesues/e të Kuvendit një kandidat/e të LDK-së, ndonëse, sipas saj, kjo e drejtë u takon atyre si fitues të zgjedhjeve.
“Jemi pajtuar të ndajmë përgjegjësitë udhëheqëse ministrore në mënyrë të barabartë”, ka shkruar ajo.
Ndërsa ka thënë që partia e saj është e interesuar të flas për presidentin, dhe thekson se janë të interesuar ta gjejnë një kandidat ose kandidate të denjë.
“Mund të flasim dhe për presidentin, madje jemi të interesuar të punojmë seriozisht në gjetjen e një kandidati ose kandidateje të denjë, konsensuale e që paraqet unitetin e popullit, ashtu si e kërkon kushtetuta. Andaj pasi të jemi dakorduar plotësisht për qeverisjen, mund të angazhohemi seriozisht për pozitën e të parit apo të parës së vendit. Me mirëkuptim, me seriozitet e dashuri për vendit, ndryshe duhet të kthehemi dhe një herë tek sovrani”, theksoi ajo.
Takimet e deritanishme për arritjen e koalicionit qeverisës ndërmjet Lëvizjes Vetëvendosje si parti e parë në zgjedhjet e 6 tetorit dhe LDK-së si parti e dytë kanë përfunduar pa asnjë marrëveshje.
Krerët e dy partive, Albin Kurti dhe Isa Mustafa duket se nuk po gjejnë gjuhë të përbashkët sa i përket postit të presidentit./ Insajderi.com
