Kryetari i PD-së, Lulzim Basha, ishte sot në Shkodër për të zhvilluar takime me qytetarët.
Ai falënderoi publikisht të gjithë qytetarët shkodranë për refuzimin masiv që ata i kanë bërë regjimit të Edi Ramës.
Sipas Bashës, edhe socialistët shkodranë i dhanë shuplakë Ramës, duke i dhënë atij mesazhin e qartë se ata nuk bëhen pjesë e kupolës kriminale të Rilindjes.
“Së pari dua t’i shpreh mirënjohjen më të thellë këtij qyteti fisnik, zemrës europiane të Shqipërisë! Siç ka qenë në histori, ashtu është edhe sot. Me refuzimin rekord për librat Guiness, prej 94 % të qytetarëve që refuzuan jo vetëm farsën e 30 qershorit, por regjimin e hajnave dhe kriminelëve të Edi Ramës”, ka thënë Basha.
Ai gjithashtu ka falenderuar çdo qytetar shkodran, demokratëve të Shkodrës, mbështetës të PD dhe të djathtës, mbështetësve të opozitës, por edhe socialistëve shkodranë, që me numra record, sipas tij, braktisën zgjedhjet e 30 qershorit.
Lulzim Basha theksoi se edhe socialistët shkodranë refuzuan Ramën, që e ka kthyer partinë e tyre në organizatë kriminale.
“Se njësoj si vëllezërit dhe motrat e tyre demokratë, njësoj si vëllezërit dhe motrat e tjerë, të Shkodrës dhe mbarë Shqipërisë, ata nuk janë gati ta pranojnë më uljen e kokës uljen e zverkut përpara hajdutërisë dhe kriminalitetit të kupolës të organizatës të strukturuar kriminale të Rilindjes”, ka përfunduar Basha.
