Kuvendi Komunal i Mitrovicës ka miratuar të premten në mënyrë unanime propozim-vendimin për dhënien e pronës së komunës në shfrytëzim të Forcave të Sigurisë së Kosovës, për ndërtimin e bazës më të madhe ushtarake në “Kodrën e Cërrnushës”, transmeton Insajderi.
Në mbledhjen e drejtuar nga kryesuesi i Kuvendit, Safet Kamberi, të pranishëm në këtë seancë ishin edhe zv. ministri i Ministrisë së Mbrojtjes, Enver Dugolli, zv. komandanti i Regjimentit i Tretë, Ilir Beqiri dhe nënkoloneli, Afrim Veseli.
Lidhur me dhënien në shfrytëzim të kësaj prone komunale për ndërtimin e kazermës ushtarake, Kryetari I komunës, Agim Bahtiri para të pranishmëve është shprehur tejet krenar që në Kodrën e Cërrnushës në Mitrovicë, do të ndërtohet baza ushtarake më e madhe e FSK-së në Kosovë.
“Mitrovica ka vuajtur për të pasur një stabilitet të duhur ekonomik, duke e ditur që ka qenë, dhe është një qytet specifik me shumë probleme, por pavarësisht kësaj bashkërisht kemi arritur të bëjmë qytetin më stabil në Republikën e Kosovës. Tani do të kemi qytetin më stabil vendimmarrës për të mbrojtur çdo pëllëmbë të tokës së Kosovës”, ka thënë Bahtiri.
Po ashtu, ai ka shtuar se kjo tokë komunale në të cilën do të ndërtohet baza ushtarake më e madhja në vend ka 191 hektarë, dhe do të jetë në shërbim të të gjithë qytetarëve pa dallim, duke propozuar që kjo kazermë të mbaj emrin e heroit “Isa Boletini”. /Insajderi.com
