Bashkimi Evropian ka mirëpritur angazhimin e vazhdueshëm strategjik të Kosovës në rrugën evropiane dhe në dialogun me Serbinë, të ndërmjetësuar nga BE-ja, njofton Insajderi.
Në takimin joformal të Këshillit të Stabilizim Asociimit ndërmjet BE-së e Kosovës, i drejtuar nga Përfaqësuesi i Lartë për Punët e Jashtme dhe Politikën e Sigurisë, Josep Borrell, dhe Komisioneri për Politikën e Fqinjësisë dhe Negociatat e Zgjerimit, Oliver Varhelyi, që përfaqësoi Komisionin Evropian, u mirëprit rifillimi i dialogut dhe heqja e tarifës e reciprocitetit.
“Ata ranë dakord për nevojën urgjente për të përshpejtuar proceset e reformave, duke kërkuar përqëndrim të shtuar nga të gjithë akterët politikë dhe një strukturë efektive të koordinimit brenda institucioneve të Kosovës”, ka njoftuar kryeministria.
Në njoftimin nga Zyra e Kryeministrit, thuhet se pjesëmarrësit përsëritën rëndësinë e liberalizimit të vizave për Kosovën, derisa vendimi mbi propozimin mbetet në shqyrtim në Këshill.
Bëhet e ditur se në takim u diskutua edhe për Dhomat e Specializuara, rreth së cilave u tha se pjesëmarrësit kishin vlerësuar bashkëpunimin e treguar të autoriteteve të Kosovës dhe të arrestuarit.
Ndër tjerash, ZKM njofton se u nënvizua rëndësia për të arritur marrëveshje gjithëpërfshirëse me Serbinë dhe se u vlerësua thelbësore që Kosova e Serbia të përparojnë në rrugën evropiane.
“Pjesëmarrësit ranë dakord që të gjitha marrëveshjet e kaluara duhet të respektohen dhe të zbatohen”.
Delegacioni i Kosovës në këtë takim u drejtua nga kryeministri Avdullah Hoti, me pjesëmarrës, zëvendëskryeministri Driton Selmanaj dhe ministrat, Meliza Haradinaj-Stublla, Agim Veliu, Hykmete Bajrami, Selim Selimi, Besian Mustafa dhe Vesel Krasniqi./Insajderi.com
