Kandidatja e zgjedhur për deputete nga Lidhja Demokratike e Kosovës, Valentina Bunjaku-Rexhepi, beson se shumica e delegatëve të kësaj partie politike do ta mbështesin Lutfi Hazirin për t’u zgjedhur krytar i partisë në mbledhjen që pritet të mbahet më 14 mars, transmeton Insajderi.
Bunjaku-Rexhepi në Info Magazine ka deklaruar se Haziri është një fytyrë unifikuese e cila do ta bashkojë LDK-në, për të cilën thotë se është përçarë kohëve të fundit.
“Me kërkesën tonë të degës në Gjilan, Lutfi Haziri kandidon për kryetar të partisë. Ne i kemi bërë presion që ai të kandidojë për të parin e LDK-së. Ai e ka dëshmuar në shumë procese se ka qenë afër LDK-së, pasi është aty që nga fillimi i saj. Haziri ka qenë në këtë parti në ditët e mira dhe të vështira”, thotë ajo.
“Unë pa asnjë hezitim besoj se shumica e delegatëve do ta mbështesin Hazirin. Të gjitha kandidaturat për kryetar janë të mira, por mendoj se më i duhuri është Haziri, të cilin do ta votoj më 14 mars. Ndër tjera, Haziri gjithmonë e ka dëshmuar se është një fytyrë unifikuese. Ai do ta bashkojë LDK-në nga përçarjet që i kishim. Ai po ashtu do t’i bëjë bashkë të gjitha gjeneratat e subjektit”.
Bunjaku-Rexhepi shton se vetëm Lutfi Haziri mund ta shtyjë Vjosa Osmanin që ta bëjë një hap para për rikthimin e saj në LDK.
“Unë mendoj se me Lutfi Hazirin, Vjosa Osmani mund të përafrohet dhe të bëjë një hap para në LDK. Haziri ka votuar kundër shkarkimit të Osmanit si nënkryetare e LDK-së, këtë ai e ka bërë të ditur vetë”.
“Unë besoj se vetëm ai mund ta bëjë një hap për ta bashkuar Osmanin dhe të gjithë ata që janë të hidhëruar, të cilët më parë ishin pjesë e partisë. Me bashkimin e të gjithëve LDK-ja mund të dalë e para në Kosovë. Ne duhet t’iu kërkojmë falje të gjithëve që i kemi hidhëruar, duhet të ecim para, LDK-ja i duhet Kosovës”, ka thënë Bunjaku-Rexhepi në ‘Info Magazinë’. /Insajderi.com
