Deputeti i LDK-së, Armend Zemaj, ka publikuar një foto nga qershori i vitit 1998, të bërë në fshatin Viqidol të Tropojës, gjatë kohës së luftës në Kosovë e ku shihen luftëtarët e UÇK-së, ushtaraku Tahir Zemaj dhe Sali Çekaj me shokë.
Zemaj, përmes një postimi në Facebook, ka thënë se xhaxhain e tij, Tahir Zemajn, e kanë vrarë “njerëz me mantel politik.”
Postimi i Zemajt:
“Viqidol i Tropojës/Shqipëri, qershor 1998.
Sipas traditës së malësisë së Tropojës/Shqipëri: “Shtëpia është e Mikut dhe e Zotit.
Bukë krypë e zemër!”
Në fotografi, rreth kësaj tryeze të shtruar shqiptarqe sipas traditës dhe rrethanave të kohës janë gjashtë ushtarët e orëve të para të UÇK-së, bartës të organizimit të luftës çlirimtare në Dukagjin e Kosovë
Është kjo fotografi e gjallë një referencë historike që dokumenton mundin e luftetarëve të pamposhur, e të kësaj elite largpamëse të kombit që bëri historinë e shekullit të shqiptarëve.
Këtu shihen, nga e djathta:
1.Heroi i Kosovës Tahir Zemaj, ushtaraku karizmatik e i përgatitur me dije dhe fizikisht për çlirimin e Kosovës, që u vra pabesisht më 2003 nga mafia me mantel politik,
2.Hasan Zukaj, një luftëtar sypatrembur që la luksin e Zvicrës dhe erdhi e u dëshmua trimërisht në luftë,
3.Saim Tahiraj, i ulur këmbëkryq me një qëndrim burrëror, luftëtar i orëve të para të UÇK-së, në ato kohë të liga organizator i luftes në Dukagjin, sikurse e sot një aktivist e humanist i madh,
4.Deshmori Muharrem Tafaj nga Viqidoli i Tropojës/ Shqipërisë, i cili ishte bashkëngjitur forcave të UÇK-së nën ombrellën e Ministrisë së Mbrojtjes së Republikës së Kosovës, dhe ra në fushëbetejë fytafyt me armikun për të mos vdekur kurrë,
5.Heroi i Kosovës, Sali Çekaj, guri themeltar lirisë së Kosovës, një çlirimtar vizionar që në atë kohë errësire gjithnjë shihte dritë në fund të tunelit. Simboli i fitorës së betejes së Kosharës.
6.Zenun Idrizaj, ushtarak betejash, pjesëmarrës në luftëm legjendare të Kosharës, aty ku u thye kufiri që ndante shqiptarët. Ky në shtator të vitit 1996 hodhi në ajër makineritë e ndërtimit të shtepive të kolonëve serb në Baballoq/ Deçan, për ta parandaluar kolonizimin e Kosovës.
E trishtueshme sot kur sheh disa pretendues fiktiv të rolit të “ushtarakut” e “komandantit” që pa therrë në këmbë mbijetuan luftën, të cilët u katapultuan në përfundim të luftës e që synojnë ta klonojnë historinë e luftës çlirimtare dhe të UÇK, e aktualisht pa turp nuk hezitojnë të tregtojnë territorin e Kosovës, sikur ta trashëgonin nga babai.
Sakaq e ligë kur këta pretendues fiktiv prej “ushtaraku” e “komandanti” luftën e shfrytëzuan për t’u pasuruar, krijuan biznese me burim politikën, fëmijët e tyre na parakalojnë çdo ditë me makina super të shtrenjta, e “tangarlliqet” e tyre me buxhetin e Kosovës na shfaqën çdo ditë në medie.
Në anën tjetër fëmijët e heronjve, dëshmorëve, çlirimtarëve të vërtetë të UÇK janë të papunë, jetojnë në vështirësi ekonomike, së fundi bile duke menduar e pritur liberalizim e vizave për të emigruar jashtë atdheut të shtrenjt… që të mos nëpërkëmbën edhe më tej nga klounët që e kanë kapur shtetin e Kosovës”, ka shkruar Zemaj.
