Platforma e transmetimit Netflix, shpeshherë ka publikime të reja që marrin reagime të ndryshme nga shikuesit, njofton Insajderi. E disa nga filmat e serialet më poshtë, janë ata që krijuan më se shumti zhurmë së fundmi:
Cuties
Njerëzit krijuan hashtagun #CancelNetlix (Anulo Netflix) pas publikimit të posterit të “Cuties”.
Përkundër marrjes së vlerësimeve kritike dhe fitimit të një çmimi në Festivalin e Filmit Sundance 2019, disa njerëz e kanë akuzuar atë për “seksualizim” të vajzave të reja dhe “ushqyerje të pedofilisë.”
“Cuties”, flet për një vajzë 11-vjeçare, Amy Pason e cila i bashkohet një grupi kërcimi të quajtur “Cuties” në shkollë dhe shpejt bëhet e vetëdijshme për feminitetin e saj teksa rritet, duke krijuar konflikte dhe zënka me nënën e saj.
356 Days
Ky film polak, i cili është përshkruar nga disa si “pornografi e butë”, ndjek një grua që rrëmbehet dhe sulmohet seksualisht nga një anëtar i një familjeje mafioze, e cila i jep asaj një vit që të dashurohet me të ndërsa ajo mbahet e zënë rob.
Shumë e kanë akuzuar atë për erotizim të sindromës së Stokholmit. Një peticion që kërkon heqjen e tij nga Netflix thotë se filmi “përjetëson magjepsjen e kulturës së përdhunimit”.
13 Reasons Why
Drama e adoleshencës është kritikuar gjerësisht për përshkrimin e saj të vetëvrasjes adoleshente. Prodhuar nga aktorja-këngëtarja Selena Gomez, ajo përqendrohet në një nxënëse 17-vjeçare të shkollës së mesme që vret veten, duke lënë pas 13 kaseta për 13 njerëz të ndryshëm që ajo mendonte se ishin thelbësore në vendimin e saj për të kryer vetëvrasje.
Organizatat e shëndetit mendor kanë thënë që shfaqjet si ajo “mund të bëjnë më shumë dëm sesa mirë” dhe shkollat madje u kanë dërguar letra prindërve që t’i paralajmërojnë ata rreth serialit.
Netflix mori kritikat më të mëdha për një finale të sezonit, e cila fillimisht paraqiti një skenë vetëvrasjeje tre minuta të gjatë. Skena është fshirë që atëherë.
Indian Matchmaking
Shfaqja e ‘dating’ Indian Matchmaking shkaktoi një reagim të madh te shikuesit kur u publikua. Ndjek një shërbim mblesërie për indianët dhe indiano-amerikanët dhe është përshkruar nga disa shikues si shumë “seksiste”.
Shumë akuzuan serialin për mbështetjen e ideve, si martesat e rregulluara dhe forcimin e stereotipeve që tashmë ekzistojnë.
Cooking on High
Netflix u detyrua të hiqte programet e saj të përqendruara në kanabis si “Cooking on High”, “The Legend of 420” dhe “Disjointed” nga shërbimi i tij në Singapor.
Kjo ishte për shkak të një kërkese me shkrim nga Autoriteti i Zhvillimit të Medias në Singapor Infocomm (IMDA).
Singapori ka disa nga ligjet më të ashpra në botë të drogës. Qyteti-shtet ka një politikë të tolerancës zero për drogat e paligjshme dhe u imponon burgime të gjata përdoruesve të dënuar. Sipas grupeve të të drejtave, ajo ka varur qindra njerëz për shkelje droge gjatë dekadave të fundit.
Messiah
Seriali Thriller “Messiah” u anulua nga Netflix pas vetëm një sezoni pas akuzave që përmbante një ndjenjë anti-islamike nëntekstuale.
Shfaqja paraqiste Michelle Monaghan si një agjente e CIA-s që heton një figurë enigmatike të njohur si Al-Masih, i cili ndërton një legjion pasuesish pasi pretendon se u dërgua në Tokë nga një fuqi më e lartë.
Në eskatologjinë islamike, Al-Masih ad-Dajjal është një figurë e keqe e krahasueshme me Antikrishtin – emri i të cilit përkthehet në “mesia i rremë, gënjeshtar, mashtrues” në arabisht.
The First Temptation of Christ
Më shumë se dy milion njerëz nënshkruan një peticion duke bërë thirrje që Netflix të hiqte këtë komedi, e cila përshkruan Jezusin si një homoseksual.
Tundimi i Parë i Krishtit është një shfaqje e bërë nga një grup komik brazilian YouTube, që nënkupton që Jezusi është në një marrëdhënie seksuale me mikun e tij Orlando.
Eduardo Bolsonaro, djali i presidentit brazilian, shkroi në mediat sociale: “Ne mbështesim lirinë e shprehjes, por a ia vlen të sulmosh besimin e 86 përqind të popullsisë?”
The Goop Lab
“The Goop Lab” i Gwyneth Paltrow është filmuar në zyrat e markës Wellness të aktorit dhe eksploron efektivitetin e terapive alternative për sëmundjet fizike dhe mendore.
Shefi ekzekutiv i NHS Anglisë argumentoi se ai paraqet një “rrezik të konsiderueshëm shëndetësor” për publikun dhe përhap “dezinformimin”.
Ai kritikoi markën e Paltrow për “shitjen e mjeteve kundër vampirëve psikikë” dhe “pretendimi i se kremrat kimik kundër diellit janë një ide e keqe”.
Atypical
Ky serial paraqet një djalosh të shkollës së mesme të quajtur Sam i cili ka autizëm. Shumë kanë kritikuar mungesën e njerëzve autikë që punojnë në prapaskenë ose në ndonjë rol kryesor.
Mickey Rowe, i cili ishte aktori i parë autik që luajti rolin kryesor në “The Curious Incident of the Dog in the Night-Time”, tha se ishte i zhgënjyer që në disa raste prindërit e Sam e shikonin autizmin e djalit të tyre si “një tragjedi”. Të tjerët e kritikuan atë për përshkrimin e Samit si një “robot” pa sens humori. /Insajderi.com
Burimi: Independent.co.uk
