Kosova është shndërruar në një nga temat më të diskutuara të politikanëve ndërkombëtarë në Twitter. Amerikanët e evropianët po 'shtyhen' se kush ia do më shumë të mirën Kosovës.
Emisari amerikan, Richard Grenell, i ka reaguar euro-deputetes dhe raportueses për Kosovën, Viola Von Cramon, e cila me cinizëm deklaratat e mëhershme të amerikanit për Kosovën i quajti “tregime”.
Grenell, ia ka kthyer Von Cramon-it në Twitter se “në vend se të kritikosh çdo gjë që bën Administrata e Trump-it që të ndihmojë normalizimin e ekonomive të Kosovës dhe Serbisë, përse nuk koncentrohesh në të vetmen gjë që do të duhej të ishe duke e bërë; vizat për Kosovën”.
Amerikani i ka kërkuar evropianes që të pushojë së ankuari e t’iu “grah punëve”
“Ke mbetur duke u ankuar për të tjerët për 20 vjet. Kryej punët tua”, shkruan Grenell.
“Lufta” me twitta në mes të politikanes gjermane e atij amerikan, filloi kur Von Cramon e përqeshi deklaratën e Grenell-it se nuk ishte plan i Donald Trump-it shkëmbimi i territoreve, por i ish-këshilltarit të tij, John Bolton.
“Natyrisht se tash është krejt faj i John Bolton që njerëzit po flasin për shkëmbim territoresh. Tani, i shkreti, Richard Grenell, duhet t’i luftojë këto thashetheme. Po lëreni”, ka shkruar në Twitter Von Cramon.
Gjithashtu Von Cramon ia ka përqeshur angazhimin e fundit diplomatik Grenellit.
“A kishte rezultate nga ‘marrëveshjet‘ e tij të fundit – marrëveshjet për lufthansa, hekurudhat, aviacioni? S’gjeta gjë”.
Politikanët ndërkombëtarë zyrtarisht gjithmonë e thonë se nuk ka dualitet në qasjen e tyre për Kosovën, por replika të tilla tregojnë se ka dallime në atë se si e shohin ecjen përpara miqtë këtej dhe andej oqeanit atlantik.
Temat për Kosovën dhe Kosova janë shndërruar këto ditët e fundit në “qendrën e Twitter-it”, siç dikur, për arsye të tjera, ishte në qendër të mediave ndërkombëtare.
Viola, instead of criticizing everything the Trump Administration does to help normalize the economies of Kosovo and Serbia, why don’t you concentrate on the one thing you were supposed to do: visas for Kosovo. You’ve been complaining about others for 20 years. Do your part! https://t.co/YnxQYT4yqR
— Richard Grenell (@RichardGrenell) June 19, 2020
