Kryeministri i Kosovës, Ramush Haradinaj në qershor (5 dhe 6) do të qëndrojë për vizitë në Gjermani ku do të zhvillojë një takim me kancelaren gjermane Angela Merkel.
Zëdhënësja e Qeverisë, Donjeta Gashi, ka bërë të ditur se Kryeministri Haradinaj në fillim të qershorit do të udhëtojë në Berlin në një vizite dy ditore.
Me ftesë të kreut të Bundestagut gjerman, kryeministri do të marr pjesë në Lutjet e Mëngjesit që organizohen atje. Pastaj do të ketë takime me deputetë të Bundestagut, si dhe më 6 qershor do të zhvillojë një takim pune me Kancelaren Merkel”, i tha Gashi Telegrafit.
Sipas saj, agjenda e takimeve të kryeministrit Haradinaj në Berlin ende nuk është finalizuar.
Zëdhënësja Gashi tha se tashmë dihet që kërkesat e Kryeministrit Haradinaj janë mbështetja e Gjermanisë në procesin e liberalizimit të vizave, dialogut dhe fuqizimin e marrëdhënieve bilaterale.
Ndryshe, ditë më parë Haradinaj ka thënë se gjatë Samitit të Berlinit në Gjermani i është premtuar liberalizimi i vizave, ndërsa ka pohuar se si kohë opcionale mund të jetë shtatori.
