Haziri ka një mesazh për Osmanin pasi doli kundër rrëzimit të Qeverisë

Nënkryetari i Lidhjes Demokratike të Kosovës, Lufti Haziri, i ka dërguar një mesazh koleges së tij në parti, Vjosa Osmanit, e cila doli kundër mocionit për rrëzimin e Qeverisë, shkruan Insajderi.

Haziri në një intervistë për Gayetën Insajderi, ka thënë se nënkryetarja e LDK-së, Vjosa Osmani, edhe në kryesi ka shprehur qëndrimin e saj kundër, të cilin e ka bartur edhe në kryesinë e Kuvendit.

Mirëpo, nënkryetari i LDK-së, i ka dërguar një mesazh Osmanit, duke i bërë thirrje që nesër në seancën e caktuar për votimin e mocionit, të votojë pro rrëzimit të Qeverisë, ashtu sikurse shumica e partisë dhe të përçojë unitetin e brendshëm që e ka LDK-ja.

“Kryesia e LDK-së, ka qenë unike sepse ka qenë një votë kundër dhe një abstenim, grupi parlamentar i LDK-së, është i bashkuar në shumicën e madhe të tij, përkundër që ne e kemi toleruar edhe më herët edhe tash mendimin ndryshe. Zatën për mendim ndrydhe dhe deklaratë ndryshe Agim Veliu e mori vendimin e shkarkimit njëanshëm nga kryeministri por ne në partinë tonë kemi kulturë tjetër, mendimi ndryshe vlerësohet krejt në një rrafsh tjetër edhe unë besoj që edhe nesër LDK-ja do ta dëshmojë unitetin e brendshëm sepse kjo nuk nënkupton qind për qind unitet. Do të doja shumë dhe apeloj edhe sonte që të jemi unik sepse uniteti i LDK-së nënkupton unitet qytetar”, tha Haziri për Insajderin.

Me tutje Haziri ka theksuar se Kurti e ka pasur të qartë se nëse shkelet marrëveshja njëanshëm LDK-ja nuk e përballon sepse e kanë të shkruar në programin që duhet të dakordohen për shkarkime eventuale dhe duhet me qenë të dy palët të pajtuara.

“Ai nuk e ka bërë veprimin pa menduar, politikisht është i pjekur, politikisht është i angazhuar dhe ka analizuar para se me marrë këtë veprim. A e ka marrë me ndikim të kabineti të tij dhe lidershioit të tij, është çështje e tij, e dinë më mirë se unë, nuk u përzihem atyre”, u shpreh Haziri.

Haziri thotë se për partneritet duhet ta lësh vetën keq dhe në Kosovë po mungon kjo kulturë.