Ministri i Jashtëm i Hungarisë, Sandor Pinter, ka pritur sot në takim ministren Dhurata Hoxha, me të cilën kanë diskutuar për procesin e liberalizimit të vizave për Kosovën.
Ministri hungarez ka shprehur mbështetjen e tij të plotë pro liberalizimit, duke thënë se një gjë e tillë do të sillte vetëm gjëra pozitive.
Ministrja për Integrim Evropian, Dhurata Hoxha, u prit sot në takim në Budapest nga ministri i Punëve të Brendshme të Hungarisë, Sandor Pinter, dhe me këtë rast theksoi rëndësinë e liberalizimit të vizave dhe plotësimin e kritereve nga ana e Kosovës për liberalizim.
Ministrja Hoxha e njohu nga afër me të arriturat dhe sfidat e procesit integrues, Pinter, në veçanti rreth plotësimit të kritereve për liberalizimin e vizave dhe njëherësh kërkoi mbështetje nga ai për këtë proces në mbledhjen e Këshillit të ministrave.
Lëvizja e lirë do të shënonte një moment tepër të rëndësishëm për qytetarët tanë, ceku ministrja Hoxha, duke vënë në pah uljen e jashtëzakonshme të migrimit ilegal në vitet e fundit, fushatën e suksesshme të informimin rreth rregullave për lëvizjen e lirë në shtetet e Shëngenit, si dhe anketave kredibile rreth përqindjes së ultë të të rinjve për migrim, janë faktorë që do të ndikonin në vendimmarrje, nga ministrat gjegjës në Këshillin e Ministrave.
Ministri Pinter e falënderoi ministren Hoxha për argumentet e parashtruara, duke vënë në spikamë, rëndësinë e përmbushjes së kritereve nga udhërrëfyesi, por edhe të faktit se Kosova është i vetmi vend në Evropë me kufizim të lëvizjes së lirë.
Ai e siguroi ministren Hoxha se Hungaria, që nga fillimi i demokracisë, ishte krah qytetarëve të Kosovës, jo vetëm me njohjen e pavarësisë por edhe për integrim në organizatat ndërkombëtare.
Pinter ritheksoi se liberalizimi i vizave për qytetarët e Kosovës, do të sillte vetëm të mira jo vetëm për Kosovën dhe rajonin por edhe më gjerë, duke rikonfirmuar mbështetjen e gjithanshme nga Hungaria.
Ne jemi zotuar, madje vlen si zotim konsensual i Republikës tonë, se rruga jonë pa alternativë është rruga integruese, theksoi ministrja Hoxha. Në këtë fazë të zhvillimeve, me prioritet është liberalizimi i vizave, theksoi ajo, duke vënë në pah se Komisioni dhe Parlamenti Evropian e kanë rikonfirmuar përmbushjen e kritereve nga ana e Kosovës për liberalizim.
