Kishte qenë qershori i këtij viti kur Jetullah Geci i njohur si një ish-komandant i Brigadës 112 “Arben Haliti” i ishte drejtuar me një letër, kryetarit të PDK-së, Kadri Veselit, ku në cilësinë e një miku të vjetër të Veselit i kishte bërë një kërkesë miqësore duke e lutur të heq dorë nga Komandantët e luftës.
“Unë e di se ti, duke qenë pjesë e luftës e ruan një respekt për njerëzit që e bënë atë, por mendoj që ka ardhë koha që PDK-ja të lirohet pak nga komandantët e UÇK-së. Zgjedhjet e fundit e dëshmuan këtë”, shkruant Geci në letrën e tij.
Ish eprori i lartë i UÇK-së, kërkonte nga kreu i PDK-së, që t’i jap shansin figurave të reja në parti, rinisë kosovare që sic thotë ai janë e ardhmja e vendit.
“Kosova ka sot të rinjtë të shkolluar brenda dhe jashtë vendit dhe PDK-ja duhet të jetë strehë për ta. Kosova që ka nevojë të zhvillohet ekonomikisht, ta rris mirëqenien sociale të shkojë kah NATO dhe BE-ja, e ka të ardhmen e saj në duar të gjeneratave të reja për çka PDK duhet t’u ofrojë mundësinë“, shkruante ai.
Por kur ka ardhur koha për zgjedhjet lokale, Geci ka bërë të kundërtën e asaj që kishte kërkuar nga Veseli. Është kandiduar vetë për asamblenë e Komunës së Skenderajt pikërisht nga Partia Demokratike e Kosovës./Insajderi.com
Letër shokut tim
I nderuar kryetar i Partisë Demokratike të Kosovës.
Shok im i idealeve, i luftës për çlirimin e Kosovës dhe i paqes.
Si një bashkëpartiak dhe një prej komandantëve të parë të luftës së UÇK-së e kam më të lehtë të kërkojë nga Ju diçka që ndoshta shumë shokë tanë e kanë menduar por kanë hezituar të ta thonë.
Unë e di se ti, duke qenë pjesë e luftës e ruan një respekt për njerëzit që e bënë atë, por mendoj që ka ardhë koha që PDK-ja të lirohet pak nga komandantët e UÇK-së. Zgjedhjet e fundit e dëshmuan këtë.
Kjo nuk kupton që ju ta humbni respektin e as nderimin për ta, por ka ardhë koha që PDK-ja të hap dyert për gjeneratat e reja.
Shikimi nga e kaluara sikur po e dëmton të ardhmen e partisë dhe të Kosovës.
Kosova ka sot të rinjtë të shkolluar brenda dhe jashtë vendit dhe PDK-ja duhet të jetë strehë për ta.
Kosova që ka nevojë të zhvillohet ekonomikisht, ta rris mirëqenien sociale të shkojë kah NATO dhe BE-ja, e ka të ardhmen e saj në duar të gjeneratave të reja për çka PDK duhet t’u ofrojë mundësinë.
Kush me mirë se unë e Ti dhe shokët tanë, e di se çka është në gjendje të bëjë rinia kosovare. Ne e kemi dëshmuar gjatë viteve 90-ta, duke ia kthyer pushkën armikut dhe duke e mundur Serbinë kur të gjithë i druheshin “fuqisë” së saj.
Për fat lufta ka përfunduar por tash Kosovën e pret një betejë tjetër; ajo e zhvillimit ekonomik.
E ardhmja e saj është në duart e rinisë. Prandaj Kadri, po të drejtohem me një këshillë shoqnore.
Komandantët e UÇK-së e meritojnë vendin me të lartë kur flitet për heroizmat, trimërinë, luftën e shenjë, por PDK-ja duhet të lirohet tashmë nga autoriteti që ata kanë krijuar brenda strukturave te partisë.
Komandantët e UÇK-së, përfshirë edhe mua, do jenë gjithmonë me Ty, por ti mendo më shumë për rininë. Ofroj ata, jepju mundësinë. Tregoju që PDK-ja është shtëpia e tyre.
Ata janë e ardhmja e vendit.
Miku juaj Jetullah Geci – ish komandant i Brigadës 112 “Arben Haliti”
