Punëtorët e Telekomit të Kosovës sot kanë hyrë në grevë të përgjithshme me qëllim të parandalimit të lidhjes së kontratës së re me “Z-mobile”, teksa ata po paralajmërojnë edhe padi ndaj kësaj kompanie.
E kontrata në mes të Z-Mobile dhe Telekomit të Kosovë ka validitet deri nesër më datën 30 korrik 2019, ndërsa ende nuk ka ndonjë vendim zyrtar për shkëputjen e kësaj kontrate, përveç një deklarimi publik që udhëheqësit e Telekomit e bënë ditë më parë.
Kryetari i Sindikatës së punëtorëve të Telekomit të Kosovës, Lamih Balaj për KosovaPress, ka theksuar se punëtorët e Telekom-it në asnjë mënyrë nuk do të pranojnë lidhje e një kontrate të re me Z-Mobile.
Varësisht nga hapat që do i ndërmarrë menaxhmenti i Telekomit, Balaj paralajmëron edhe ashpërsim të veprimeve të tyre sindikale.
“Nesër do të vazhdoj greva në tërësi, do të jemi komplet punëtorët këtu nga të gjitha regjionet dhe në asnjë mënyrë nuk do të lejojmë që të vazhdohet ndonjë kontratë tjetër me kompaninë Z-Mobile. Tashmë është e ditur botërisht që kompania Z-Mobile i ka shkaktuar dëme të jashtëzakonshme Telekomit të Kosovës dhe ne nuk kemi nevojë që me një kompani që e ka sjellë në këtë gjendje Telekomin me pas partneritet. Këshilli i grevave ka vendosur, tashmë greva është e pashmangshme, nga nesër do të jenë të gjitha regjionet në Prishtinë dhe krejt varet prej proceseve nëse do të ketë ndonjë lëvizje nga bordi dhe çdo tentim i vazhdimit të kontratës tjetër, apo zgjatjen e një marrëveshje të re me Z-Mobile për ne është e papranueshme”, thotë ai.
Për dëmet e shkaktuara Telekomit, kryesindikalisti Lamih Balaj thotë se do ngrisin padi ndaj Z-Mobile, madje nëse është nevoja thotë se do padisin edhe menaxhmentin e Telekomit.
“Nuk ka mirëbesim ndaj një kompanie e cila të dërgon në arbitrazh e cila e ka thyer kontratën në vazhdimësi. Unë nuk dua të besoj në vullnetin e kryeshefit dhe ndoshta edhe të bordit për mos vazhdimin e kësaj kontrate, por çdo tentim pa marrë parasysh një, dy, tre dhe katër ose 10 përqind për ne është e papranueshme sepse tashmë Z-Mobile, është kah dihet që e ka dëmtuar Telekomin e Kosovës dhe ajo ndoshta mundohet që hajde po e pranojmë një ofertë sa për t’ia mbyllur opinionit publik sytë, por për ne është e papranueshme. Këtu ka punë Prokuroria e Shtetit për të gjitha dëmet që Telekomit ia ka shkarkuar Z-Mobile edhe ne si sindikatë jemi duke e përgatitur një padi që do e dërgojmë në gjykatë për dëmet që na janë shkaktuar, por sigurisht edhe menaxhmenti nuk do ndalemi, nuk ka kontratë me Z-Mobile”, shprehet Balaj.
Derisa beson se vendimi për 25 milionët nuk do të ekzekutohet, Balaj kërkon nga Qeveria dhe sistemi i drejtësisë që të reagojë sa më parë edhe ta anulojë vendimin e arbitrazhit.
“Unë besoj që Prokuroria duhet ta ndal këtë, ato nuk janë para të Telekomit, por janë para të popullit atyre që paguajnë, aq më pak të një krimi të organizuar i cili me viti e ka zhvatur Telekomin e Kosovës, unë besoj fuqishëm se nuk duhet të paguhen ato mjete, këtu duhet të reagoj edhe Qeveria, duhet të reagojnë edhe të gjitha institucionet, edhe gjykata dhe prokuroria që i ka letrat në dorë për ta anuluar këtë vendim”, theksoi Balaj.
Kujtojmë që kryeshefi i Telekomit të Kosovës më 15 korrik ka njoftuar se ka pranuar propozim përmbarimin nga kreditori ”Dardafon.net LL.C.” Ndërsa, Telekomi i Kosovës në cilësinë e debitorit sipas këtij njoftimi i obligohet që kreditorit t’i jap njëzet e pesë milionë euro, vlerë kjo që pritet të saktësohet pas ekspertizës financiare, ku pritet të kalkulohen edhe kamatat./B.Ibishi/
