Pasditen e së shtunës në qytetin Iserlohn të Gjermanisë është raportuar se një burrë 43-vjeçar ka goditur me thikë një grua 32-vjeçare dhe një burrë 23-vjeçar. Mediat gjermane kanë shkruar se dorasi dyshohet të jetë kosovar, transmeton Express.
Në raportimin e mediave gjermane thuhet se 43-vjeçari e ka goditur me thikë kuzhine ish-bashkëshorten e tij dhe burrin i cili raportohet të ketë qenë partneri i viktimës.
Ndërkaq, raportohet se dorasi dhe gruaja 32 vjeçe janë nga Kosova, kurse 23-vjeçari nga Afganistani.
“Bild” shkruan se gruaja kishte me vete një vajzë dymuajshe ndërsa nuk raportohet që foshnja ka marrë lëndime.
Raportohet po ashtu se i dyshuari është dorëzuar tek forcat policore menjëherë pas aktit në vend të ngjarjes, pa rezistencë, raporton Koha.net.
Në bazë të autopsive që u janë bërë dy viktimave sot, del se ata kanë pësuar disa plagë të shkaktuara nga thika, e cila është konfiskuar në vend të ngjarjes.
Arsyeja e këtij sulmi nuk dihet, por çifti kishte kohë që jetonin të ndarë.
