Një reagim publik i Kreut të Sindikatës Profesionale të Telekomit, Muhamet Xhemajli, rreth gjendjes në Telekom, ka mjaftuar që ky i fundit të degradohet në pozitë nga menaxhmenti.
Së paku kështu thotë Xhemajli në një reagim dërguar mediave.
“Desha t’ju njoftoj se pas reagimeve në vazhdimësi në media nga Sindikata Profesionale e Punëtorëve SPP Telekomi i Kosovës në lidhje me keqpërdorimet dhe Gradimet/Degradimet dhe nominimet në vende të punës pa kritere, ju njoftoj se sot me date 28.10.2019 Kryeshefi Ekzekutiv z. Bedri Istrefi edhe pas kërcënimit qe ka bere ndaj meje, sot i njëjti ka bere degradimin e pozitës time si kryetar i Sindikatës SPP, gjë që është në kundërshtim me Ligjin mbi Sindikatat saktësisht Neni 24”, thuhet në reagimin e Xhemajlit.
Buletini Ekonomik ka siguruar edhe vendimin e kryeshefit ekzekutiv me të cilin pozita e Xhemajlit nga mbikëqyrës i lartë në Telekom, tash e tutje do të jetë montues i antenave në regjionin e Mitrovicës.
“Punëtori/ja, Muhamet Xhemajli, i/e sistemuar në punët dhe detyrat e punës, Mbikëqyrës i Kontrollit të Brendshëm në Menaxhimi i Sigurimit të të hyrave risistemohet në punët dhe detyrat e punë Montator në regjionin e Mitrovicës”, thuhet në vendimin e kryeshefit, një kopje të të cilit e ka siguruar Buletini Ekonomik.
Ndryshe, Xhemajli ka paralajmëruar një konferencë për ditën e nesërme.
