Kryetari i Lëvizjes Vetëvendosje, Albin Kurti ka thënë se objektivat e Bashkimit Evropian në Kosovë dhe ato të partisë në të cilën ai është anëtar i kryesisë, Vetëvendosje, janë të dallueshme.
Në një intervistë me portalin francez Politique Internationnale, ish-lideri i VV-së ka thënë se “për BE-në në Kosovë ekzistojnë tri fjalë kyçe: paqe, siguri, stabilitet”. Megjithatë, Kurti tha se Vetëvendosje i respekton këto parime të BE-së, miëpo ajo që partia më e madhe opozitare dëshiron, janë tri gjëra të tjera.
“Vetëvendosje është ndryshimi i plotë i paradigmës. Ne kërkojmë tri gjëra: drejtësi, demokraci, zhvillim”, deklaroi Kurti, transmeton Insajderi.
Më tej, Kurti tregoi arsyen se përse mendon që tri objektivat e Vetëvendosjes janë më të fuqishme se ato të BE-së.
“Nuk jam kundër paqes, sigurisë ose stabilitetit; por e vetmja mënyrë për t’i realizuar këto qëllime është ta forcojmë drejtësinë, demokracinë, zhvillimin. Deri tani, për ta garantuar paqen, sigurinë dhe stabilitetin; bashkësia ndërkombëtare e ka toleruar korrupsionin e elitave politike kosovare, por besoj se populli është sot i gatshëm ta përmbytë këtë gjendje ekzistuese”, tha Kurti.
Kurti gjithashtu tha se Vetëvendosje është duke u rritur si forcë politike në Kosovë, dhe se sipas tij, ajo tanimë qëndron si partia e dytë më e madhe në Kosovë pas Partisë Demokratike të Kosovës. /Insajderi.com
