Ka filluar seanca ndaj 30 personave që u arrestuan gjatë aksionit të Policisë së Kosovës në fshatin Karaçevë, në mbrëmjen e së premtës.
Siç raporton REL, kjo seancë po mbahet në Gjykatën Themelore të Gjilanit për të arrestuarit në mesin e të cilëve ka edhe policë që kanë dalë para gjyqtarit të procedurës paraprake, transmeton Insajderi.
Policët u arrestuan me dyshimin se keqpërdorën detyrën zyrtare.
Në një konferencë për media të mbajtur të shtunën, kryeprokurori i Prokurorisë Themelore në Gjilan, Jetish Maloku, ka dhënë detaje rreth këtij operacioni. Sipas tij, Policia e Kosovës ka arritur që të arrestojë 35 persona, në mesin e tyre edhe 12 policë.
Po ashtu, Maloku ka njoftuar se janë konfiskuar edhe një sërë materiale të dyshimta.
“Prokuroria Themelore në Gjilan, pas një hetimi të gjatë gati 1-vjeçar, ka realizuar aksion në këtë pjesë të Kosovës konkretisht në fshatin Karaçevë, komuna e Kamenicës si dhe në rajonin e Prishtinës dhe rajone të tjera. Nga ky aksion me urdhër të prokurorisë deri më tani janë arrestuar 35 të dyshuar prej tyre 12 zyrtarë policorë, kontrabandistë e pronarë të kazinove”, ka thënë Maloku.
Në këtë aksion u rrënuan edhe 12 objekte ku zhvillohej veprimtaria e bixhozit dhe lojërave të fatit. /Insajderi.com
