Degëzimi Austriak i zinxhirit amerikan të fast foud-it, “MacDonald” tërhoqi pas fjalët e tij dhe u kërkoi sot falje italianëve për një fushatë publicitare me në sfond mafien, që zemëroi ministrin italian të Punëve të Brendshme, Matteo Salvini.
Në këtë poster reklamohej një produkt i ri i frymëzuar nga Italia, ku në foto ishte një hamburger dhe slogani “Fuer echte Mampfiosi” (Për mafiozë të vërtetë), një lojë fjalësh mbi mafiozët, anëtarët e klaneve kriminale italiane.
“Ne nuk synonim të ofendonim italianët në asnjë mënyrë dhe me sinqeritet i kërkojmë falje të gjithëve që ndihen të ofenduar”, tha zëdhënësi i kompanisë në një deklaratë.
Megjithatë Salvinit nuk iu duk aspak për të qeshur ky slogan të cilin e kritikoi të dielën.
Në Itali ndodhen disa prej organizatave kriminale mafioze më të fuqishme, si “Ndrangheta” që është e njohur për drejtimin e trafikut të kokainës në Europë.
Muajin e kaluar, Salvini përgëzoi policinë për një operacion të shkallës së gjerë kundër grupit “Kamorra”, që solli arrestimin e më shumë se 120 të dyshuarve, si dhe kapjen e 152 pronave, 101 automjeteve, 92 motorëve dhe një anije./ATSH/
