Deputetja shqiptare nga radhët e BDI-së, Ermira Mehmeti, e cila është raportuar për një regjistrim telefonik në biseda të nxehta mes saj dhe zëvendës-kryeministrit maqedonas, Musa Xhaferri, u shpreh se e gjitha kjo është një montazh e bërë nga “laboratorët e nëntokës”.
Përmes një lidhje telefonike në emisionin “Opinion”, Mehmeti tha se ky përgjim është një montazh që është bërë për t’ia shkatërruar karrierën asaj.
“Është një montazh i bërë nga laboratorët e nëntokës për të më shantazhuar mua personalisht. Nuk ka asnjë qëllim tjetër përpos që të më diskreditoj mua si një femër e shkolluar që përfaqësoj gjithë shqiptarët e Maqedonisë, për të cilët është pretenduar se janë shumë konservatorë”, ka thënë Mehmeti.
Ajo tha se këto montime janë bërë shpesh në shtetet e ish-Jugosllavisë, dhe këto i shërbejnë vetëm shtetit.
“Jam e bindur që në këto lloj montime janë asgjë e panjohur për shoqërinë shqiptare që ka jetuar nën jugosllavi, këto i bëjnë shërbimet e shtetit pasi ne shteti bën ç’të do me fatin tonë”, shtoi Mehmeti
Ajo tha se nuk mendon se këtë inskenim ka mundur ta bëjë partia e Bashkimit Demokratik për Integrim. /Insajderi.com
