Për herë të parë pas kthimit nga Gjermania, Isa Mustafën e kanë takuar sot dy kryetarë të komunave: Gazmend Muhaxheri nga Komuna e Pejës dhe Imri Ahmeti nga Komuna e Lipjanit.
Kryetari i Lidhjes Demokratike të Kosovës i ka pritur sot në shtëpinë e tij dy kryetarët e komunave, të cilët fituan pa balotazh në Zgjedhjet Lokale të 22 tetorit, të vitit të kaluar, raporton Gazeta Online Insajderi.
Fotografinë e ka publikuar në rrjetin social Facebook kryetari i Lipjanit, mirëpo nuk ka njoftuar se për çfarë kanë biseduar me Mustafën.
Ndërkaq, vizita e Gazmend Muhaxherit tek kryetari i LDK-së korrespondon me deklarimin e sotëm të tij, ku shprehu dëshirën që të jetë kandidat i LDK-së për kryeministër në zgjedhjet e ardhshme qëndrore.
“Besoj që unë duhet të jem kandidatë për kryeministër. Kam qeverisur mirë dhe kam fituar pa balotazh. Nuk shoh ndonjë kandidaturë tjetër”, tha Muhaxheri në emisionin “Zyra e Ankesave” të televizionit Dukagjini.
Insajderi ka provuar të kontaktojë sot me Imri Ahmetin lidhur me takimin që ai dhe Muhaxheri patën sot me Mustafën, por kontakti me të ka qenë i pamundur. /Insajderi.com
