Skuadra e Ballkanit, ka pësuar më së shumti në vendimet e Komisionit Disiplinor të Federatës së Futbollit të Kosovës.
Klubi nga Suhareka është gjobitur me 2000 euro, për deklarata ofenduese drejtuar organeve të FFK-së, lidhur me ecurinë e rrjedhës së ndeshjeve.
Klubi i futbollit kosovar, në një letër të hapur, kishte pretenduar se ka pasur ndeshje të kurdisura nga klubet e Kosovës.
Gjithashtu ndaj Ballkanit është hapur edhe procedurë disiplinore për lëshimin e organizimit të ndeshjes ndaj Llapit.
“Nga minuta e 88 e deri në përfundim, së paku në katër raste, mbledhësit e topave hedhin topin e dytë në fushë me qëllim të zvarritjeve së lojës”, thuhet në vendimin e Komisionit Disiplinor.
Pa u ndëshkuar nga Komisioni Disiplinor, nuk ka shpëtuar as lojtari i tyre, Kushtrim Gashi.
Gashi u dënua me dy ndeshje, pas konfrontimit me lojtarin kundërshtar në ndeshjen ndaj Llapit, i cili gjithashtu u ndëshkua me karton të kuq në atë ndeshje.
Ballkani është duke luftuar për titullin kampion në Superligën e Kosovës, në një garë të ashpër me Prishtinën dhe Dritën.
Ata aktualisht pozicionohen në vendin e parë në tabelë me 67 pikë, një më shumë se Prishtina dhe dy më shumë se Drita.
Ndeshjen e radhës, skudara e Blendi Shkembit, do ta zhvillojë në udhëtim te Drenica, të dielën me fillim nga ora 15:00.