Prokuroria Themelore bë Gjilan ka ngritur aktakuzë për veprën penale “vrasje e rëndë”, për burrin që vrau bashkëshorten e tij me 25 korrik në fshatin Berivojcë në Kamenicë, njofton Insajderi.
Sipas aktakuzës, i pandehuri N.M., më 25 Korrik 2020, për shkak të mosmarrëveshjeve të vazhdueshme familjare, me dashje ka privuar nga jeta bashkëshorten e tij, tani të ndjerën S.M., ashtu që pas fjalosjes, i njëjti me shufër metalike, e ka goditur në dorën e majtë dhe në kokë, e cila pasi është rrëzuar në dysheme, përsëri ka vazhduar ta godasë disa herë në kokë dhe pjesë tjera të trupit, duke i shkaktuar plagë vdekjeprurëse.
Në këtë mënyrë, i pandehuri ka kryer veprën penale ‘’Vrasja e rëndë’’, nga neni 173 paragrafi 1 nën paragrafi 1.3 të Kodit Penal të Republikës së Kosovës.
Prokurori i rastit i ka propozuar Gjykatës kompetente në Gjilan, që të njëjtit t’i vazhdohet masa e paraburgimit dhe të shpallet fajtor për këtë vepër penale./Insajderi.com
