OBSH: Po punohet në mbi 70 vaksina kundër koronavirusit, tri po testohen në njerëz

OBSH: Po punohet në mbi 70 vaksina kundër koronavirusit, tri po testohen në njerëz

Sipas Organizatës Botërore të Shëndetësisë, ekipe të ndryshme të shkencëtarëve në mbarë botën janë duke punuar në 70 vaksina të ndryshme për trajtimin e koronavirusit, ndërsa tri prej tyre tashmë kanë hyrë në fazën e testimit në njerëz.

Njëra nga vaksinat që po testohet në njerëz është zhvilluar nga Instituti i Pekinit për Bioteknologji, ndërsa dy të tjerat nga kompanitë amerikane.

Pjesa tjetër e vaksinave, të zhvilluara nga shkencëtarët botërorë, përfshirë ata britanikë, është gjithashtu duke shkuar drejt fazës së testimit në njerëz.

Në Shtetet e Bashkuara, kompania Moderna e mori miratimin për testim muajin e kaluar, ndërsa kompania tjetër, Inovio, mori leje për testim të vaksinës në njerëz javën e kaluar.

Vaksinat e tjera po zhvillohen nga shkencëtarët e universiteteve të ndryshme të botës, përfshirë Universitetin e Osakas në Japoni, Universitetin e Queensland-it në Australi dhe Universitetin e Oksfordit në Britaninë e Madhe.

Industria e ilaçeve po shpreson që të shkurtohet koha që zakonisht nevojitet që një vaksinë e re të dalë në treg – rreth 10 deri në 15 vjet – në një vit ose një vit e gjysmë, shkruan “Daily Mail”.