Padia që ish-rektori i UP-së i kishte bërë Kishës Ortodokse në vitin 1994 për uzurpimin e tokës

Ish-rektori i Universitetit të Prishtinës “Hasan Prishtina”, Ejup Statovci, më 30 janar të vitit 1994 kishte ngritur padi ndaj Kishës Ortodokse serbe për ndërtimin e kishës që kishte filluar në Kampusin e UP-së.

Sipas, padisë së bërë nga Statovci,  Kisha Ortodokse ishte duke penguar pronën të cilën ish-rektori pretendonte në padi se po tentohet të uzurpohet nga Kisha Ortodokse.

Statovci në padinë që ka siguruar Gazeta Online Insajderi, kishte përdorur si argument vendimin e Kuvendit Komunal të Prishtinës e cila kishte përcaktuar qartë se ajo pjesë do të shfrytëzohet vetëm nga UP-ja.

“Me vendimin e Kuvendit komunal të Prishtinës 011/54/75 të dt. 12 dhjetor 1975 (i publikuar në ‘Gazetën zyrtare të KSAK’ 54/75 të dt. 30 dhjetor 1975), është miratuar Plani i detajuar i Qendrës universitare në Prishtinë. Sipas këtij vendimi hapësirat e kompleksit të Qendrës universitare në Prishtinë përfshinë tokën e ndërtimit të qytetit e cila kufizohet me: kah lindja me rrugën ‘Ramiz Sadiku’, kah perëndimi me rrugën ‘Mareshali Tito’, kah perëndimi me kompleksin e ndërtesave banesore në pronë shoqërore dhe kah jugu me rrugën e ‘Sremit’ (Neni 1.). Hapësirën e lartpërmendur do ta shfrytëzoj vetëm Qendra Universitare, për funksionin i cili është vërtetuar me Programin e zhvillimit të paditësit – Universitetit të Prishtinës për arsim të lartë dhe për park”, thuhet në Padinë që Statovci kishte ngritur ndaj Kishës Ortodokse.

Sipas paditësit, Kisha Ortodokse kishte përvetësuar pjesën prej 7 hektarëve duke hapur themelet dhe vendosjen e materialeve ndërtimore me qëllim sipas paditësit përvetësimin e pronës.

“Edhe përkundër asaj që aktet e lartpërmendura juridike të Kuvendit të Republikës së Serbisë janë kontestuar pranë Gjykatës Kushtetuese të Jugosllavisë, mbi të cilat ende nuk është marrë vendimi i kësaj gjykate, dhe përkundër faktit se paditësi ka qenë në posedim të kompleksit të Qendrës universitare, gjegjësisht edhe në posedim të hapësirës e cila në mënyrë të kundërligjshme i është dhënë të paditurës, me 6.12.1992 e paditura në mënyrë  të padrejtë e ka larguar paditësin nga posedimi i patundshmërisë, me hapjen e themeleve të tempullit ortodoks dhe vendosjen e materialit ndërtimor, duke e përvetësuar në këtë mënyrë një pjesë të ngastrës kadastrale të paditësit nr. 7090 me sipërfaqe prej 7 hektarëve, me çka ka kryer aktin e pengimit të pronës, gjë që mund të vërtetohet më saktësisht me shikimin në vendin e ngjarjes dhe me ekspertizë”, thuhet më tej në padinë e ish-rektorit ndaj Kishës Ortodokse.

Statovci kishte kërkuar që Kishës Ortodokse, t’i ndalohet aktivitet dhe t’i ndalohen punimet.

“CAKTOHET  masa e përkohshme dhe urdhërohet e paditura Kisha Ortodokse Serbe në Prishtinë t’i ndalë të gjitha punët ndërtimore dhe të mos ndërmerr asnjë aktivitet tjetër në hapësirën e Qendrës universitare në Prishtinë – në pjesën e ngastrës kadastrale nr. 7090, me sipërfaqe prej 7 hektarëve, në të cilën është filluar ndërtimi i tempullit ortodoks të Institutit  për histori kishtare dhe kulturë shpirtërore me përmbajtje përcjellëse, deri në përfundimin e plotfuqishëm të kësaj procedure sipas padisë për pengim të pronës”, ka thuhet në padi.

Është viti 2019 dhe ende nuk është marrë vendim për rikthimin e kësaj prone tek Universiteti i Prishtinës. Prona prej katër hektarësh që dikur ishte e UP-së, vazhdon që të jetë në administrim të Kishës Ortodokse serbe.

InDoks, ka realizuar një dokumentar për këtë temë, me titull: “Kisha e dhunshme e regjimit”. Aty janë sjellur rrëfime dhe dëshmi ekskluzive mbi mënyrën si u uzurpua kjo pronë, nga regjimi famëkeq i Sllobodan Millosheviqit – deri në ditët e sotme, të tentimeve të vazhdueshme që prona në të cilën është ndërtuar Kisha, t’i kthehet Universitetit të Prishtinës.

Është sjellur për herë të parë padia që UP e ka bërë në Gjykatën Themelore të Prishtinës, për rikthimin e kësaj Kishe.

Dokumentari i InDoks, për Kishën Ortodokse në oborr të UP-së