Palushi: Pres që Shqipëria të mos i trajtojë mallrat nga Kosova, si të ato të Italisë apo edhe më keq

Pronari i Kompanisë “Frutex” dhe njëherit anëtari i klubit të prodhuesve vendor, Shaqir Palushi në intervistën për Insajderi ka folur edhe për mbledhjen e dy qeverive Kosovë – Shqipëri.

Palushi në veçanti ka komentuar deklaratën e Kryeministrit të Shqipërisë, Edi Rama i cili tha se do të ketë zero (0) tarifë doganore për prodhuesit nga Kosova.

Shaqir Palushi për “Gazeta Insajderi”, tha se Klubi i prodhuesve vendor kishte vendosur të dilte në protestë, pikërisht në ditën kur do të mbahej mbledhja e dy qeverive.

Por, ky veprim u anulua për shkak të vendosjes së taksës ndaj Serbisë.

Ai ka thënë se pret përmirësim të qasjes së Shqipërisë ndaj Kosovës.

“Ne vazhdojmë të kemi një trajtim jo të dinjitetshëm në Shqipëri si prodhues përkatësisht kompanitë dhe produktet që eksportohen në Shqipëri. Ato kanë trajtim të njëjtë në raport si të ishin produkte italiane e ndoshta edhe më keq se produktet që vijnë nga Italia ose Greqia, kjo do të thotë që ne konsiderojmë që është momenti i fundit kjo qasje e Shqipërisë ndaj Kosovës të ndryshojë”, ka deklaruar ai.

Palushi ka theksuar se pritjet e Klubit të prodhuesve vendor kanë qenë shumë të mëdha nga mbledhjet e qeverive.

Ai ka thënë se pret që nga ky numër i madh i mbledhjeve të qeverive të ketë edhe ndryshime, pra përmirësim të bashkëpunimit mes të dyja vendeve.

Theksojmë se Kosova dhe Shqipëria janë pajtuar që brenda gjashtë muajve të unifikojnë doganat, të heqin tarifën e romingut në kuadër të telekomunikimit si dhe të heqin tarifat doganor./Insajderi.com