Zëdhënësi i Partisë Demokratike të Kosovës, Avni Bytyçi, ka reaguar pas raportimit në medie se nesër në mbledhjen e Kryesisë dhe Këshillit Drejtues të kësaj partie politike do të merret vendim për të hyrë në qeveri, njofton Insajderi.
Bytyçi me anë të një postimi në Facebook, e ka demantuar këtë informacion duke thënë se nuk është e vërtetë.
“Lajmi i portalit ballkani.info se nesër PDK merr vendim për të hyrë në qeveri është plotësisht i pavërtetë. Ky demant vlenë edhe për portalin rtklive.com lidhur me deklaratën e Milaim Zekës”, ka shkruar Bytyçi.
Derisa anëtari i Kryesisë së PDK-së, Ramë Buja, ka thënë se nesër do të mblidhet Kryesia dhe Këshilli Drejtues i PDK-së, analisti Milaim Zeka ka thënë se do të merret vendim për të hyrë në qeveri.
“Nesër PDK-ja do të merr vendim që të hyjë në qeveri, sepse vendi është në krizë”, ka thënë Zeka në “Debat” të RTK-së.
“Kjo është një e vërtetë se edhe kryetari Veseli nuk ka qenë kundër një qeverie të stabilitetit dhe është njeriu me racional që nga paslufta pasi që ai ishte i pari që pranoi humbjen e zgjedhjeve dhe e uroi VV-në”, është shprehur tutje Zeka. /Insajderi.com
