Stadiumi i Prishtinës ka ngecur së rinovuari, pasi për përfundimin e impiantit në kryeqytet, duhen të paktën edhe 4 milionë euro të tjera shtesë.
Ministria e Kulturës, Rinisë dhe Sportit, Komuna e Prishtinës dhe Federata e Futbollit të Kosovës, kanë shpresë të madhe që Kosova ta luajë ciklin eliminator të Kampionatit Evropian 2020, pikërisht në Prishtinë.
Ministri i MKRS-së, Kujtim Gashi, thotë se stadiumin e ka gjetur në këtë gjendje, por shton se që në ditët e para ka vepruar në këtë projekt, duke bërë shpalljen për pjesën shtesë të projektit. Ai nënvizon se Ministria është në fund të procedurës administrative, dhe pjesa tjetër do t’i mbetet operatorit ta kryejë punën e vet ashtu siç kërkohet me kontratë.
Ai është optimist se stadiumi do të jetë gati për muajin mars të vitit të ardhshëm.
“Unë besoj se sipas procedurave që janë zhvilluar deri më tani, ne do të arrijmë që deri në muajin mars ta kemi të përfunduar këtë pjesë edhe pse ndoshta këtë do të na diktojnë kushtet klimatike”, deklaroi ministri Gashi për KTV-në.
E, nga ana tjetër, kryetari i Komunës së Prishtinës, Shpend Ahmeti, deklaroi se Komuna nënshkroi memorandum mirëkuptimi me Ministrinë që pas pranimit të Kosovës në UEFA e FIFA, e ata të marrin përsipër punimet në stadiumin që është pronë e Komunës së Prishtinës. /Insajderi.com
