Presidenti i Austrisë, Alexander Van der Bellen, u ka bërë thirrje vendeve evropiane që të sigurojnë strehim për refugjatët afganë që ikin nga sundimi i talebanëve, kështu ai doli në kundërshtim me deklaratat e bëra nga kancelari austriak Sebastian Kurz i cili refuzoi afganët.
Këto komente presidenti austriak i bëri në Forumin Evropian në Tirolin Jugor, raporton Euronews, transmeton Insajderi.com.
“Unë besoj se ekziston një detyrim ligjor, moral dhe politik i Bashkimit Evropian dhe shteteve anëtare të tij për të rritur përgjegjësinë tonë e cila përfshin ofrimin e strehimit për njerëzit. Kjo përfshin ofrimin e azilit.”
“Austria, siç argumentohet nga kancelari Sebastian Kurz, ka bërë vërtet shumë deri më tani në marrjen e refugjatëve afganë gjithashtu,” tha Van der Bellen në një diskutim pas fjalimit të tij.
Kurz ishte një nga udhëheqësit e parë evropianë që shpalli publikisht kundërshtimin e pranimit të ndonjë refugjati shtesë nga Afganistani.
Grupi militant, talebanët ka marrë kontrollin e Afganistanit, kjo ka bërë shumë afganë të kërkojnë largimin nga vendi. /Insajderi.com
