Kryeprokurori i Prizrenit, Sylë Hoxha, ka prezantuar të gjeturat e raportit të autopsisë për Astrit Deharin, duke konfirmuar se aktivisti i ndjerë i Lëvizjes Vetëvendosje ka kryer vetëvrasje.
Ai në një konferencë për media ka thënë se lidhur me këtë rast janë intervistuar 17 persona ndërsa ka thënë se nuk ka dyshime për ndonjë përleshje të mundshme apo ndërhyrje nga jashtë në qelinë e Deharit.
Hoxha ka shtuar se kanë arritur që të evidentojnë të gjitha lëvizjet e të burgosurve përmes kamerave përmes së cilave “nuk është vërtetuar asnjë ndërhyrje nga faktori i jashtëm”.
Sipas tij, të gjithë të paraburgosurit që kanë ndarë dhomën me Deharin kanë qenë në shëtitje atë kohë.
Komisioni mjekësor që ka përgatitur raportin e obduksionit për vdekjen e Astrit Deharit ka konstatuar se ai ka bërë vetëvrasje.
Në raport thuhet se “vdekja e tani të ndjerit Astrit Dehari ka ardhur si pasojë e asfiksisë mekanike nga mbyllja (bllokimi) i rrugëve të sipërme të fyrmëmarrjes nga mjeti me konsistencë valide (të fortë)” dhe se kjo është vetëshkaktuar nga tashmë i ndjeri.
“Dëmtimet e përshkruara në pikën 1 dhe 2 me besueshmëri janë dëmtime të vetëshkaktuara “hezituese” të cilat kanë qenë të shoqëruara me gjakderdhje të jashtme, por të cilat nuk kanë çuar në shok hemorragjik”, thuhet në raport.
“Analizat toksikologjike të kryera deri tani, si gjatë autopsisë ashtu edhe pas asaj, rezultojnë negative për barna dhe droga”, sqaron raporti.
I ndjeri Dehari ka qenë aktivist i Lëvizjes Vetëvendosje, dhe ishte arrestuar më 30 gusht të këtij viti nën dyshimin se së bashku me aktivistë të tjerë të kësaj partie kanë sulmuar Kuvendin e Kosovës me armë. Ai vdiq më 5 nëntor.
Lëvizja Vetëvendosje në vazhdimësi që nga koha kur u dha lajmi për vdekjen e tij ka hedhur dyshime për rrethanat që kanë shkaktuar vdekjen.
