Pse Spanja është goditur më shumë se Portugalia nga koronavirusi – Flasin ekspertët

Pse Spanja është goditur më shumë se Portugalia nga koronavirusi – Flasin ekspertët

Më shumë kohë për përgatitje dhe me njerëz që i binden masave të mbylljes ka ndihmuar Portugalinë që të menaxhojë shpërthimin e koronavirusit.

Kjo mund të thuhet edhe nëse krahasojmë faktin se Portugalia ka numër të infeksioneve dhe shkallë të vdekjes nga COVID-19 shumë të ndryshme në krahasim me Spanjën fqinje, një nga vendet më të goditura.

Pulmologu Dr. Filipe Froes, një këshilltar i shefes së shëndetësisë Graça Freitas, tha se Portugalia kishte përfituar nga të qenit pas Madridit për sa i përket përhapjes së virusit.

Kjo, shtoi ai, i kishte dhënë vendit kohë për të përgatitur spitalet dhe për të rritur kapacitetet në njësitë e kujdesit intensiv, përcjell Telegrafi.

“Dallimi në Portugali ishte se kishim më shumë kohë për t’u përgatitur”, i tha Dr Froes emisionit të Euronews ‘Good Morning Europe’.

“Ne mendojmë se jemi tre javë prapa Italisë dhe mbase një javë e gjysmë pas Spanjës, kështu që kjo na dha kohë, ditë të çmuara, për t’u përgatitur. Mendoj se ndryshimi kryesor ishte edhe angazhimi i hershëm i mjekëve të kujdesit parësor”.

Ndryshe, sipas Euronews, Portugalia shpalli një gjendje të jashtëzakonshme më 18 mars, vetëm dy ditë pasi u raportua vdekja e parë nga COVID-19.

Në kohën e shkrimit, Portugalia ka konfirmuar 535 vdekje COVID-19, e cila rezulton si 52 për një milion të popullsisë.

Në Spanjë, më shumë se 18,000 persona kanë gjetur vdekjen nga sëmundja, duke i dhënë asaj një normë prej 385 vdekjesh për secilin një milion banorë.

Shkalla e infeksionit të Madridit është gjithashtu e dyfishtë e asaj të Lisbonës, megjithëse kjo masë mund të zvogëlohet nga sa teston një vend.

Freitas, drejtore e përgjithshme i shëndetësisë i Portugalisë, tha se 88 për qind e rasteve të konfirmuara të vendit po qëndrojnë në shtëpi dhe nuk kërkojnë trajtim spitalor.

“Spitalet nuk janë mbingarkuar dhe ne kemi më shumë kohë dhe kushte më të mira [për të ndjekur] pacientët kritikë në Njësitë Intensive”, ka thënë ajo.

“Të dhënat që kemi tregojnë se maksimumi i potencialit tonë nuk është arritur ende, gjë që pasqyron evolucionin e epidemisë”.

‘Frymë qytetare e pashembullt’

Një studim nga Universiteti Nova i Lisbonës tregon se “riprodhimi” i COVID-19 në Portugali ishte më i ulëti në Evropë gjatë 25 ditëve të para të epidemisë.

Dhe Dr. Froes beson se bindja e qytetarëve ka qenë thelbësore në parandalimin e përhapjes së mëtejshme të virusit.

“Shumica e aktiviteteve janë të mbyllura, siç janë shkollat dhe aktivitetet tregtare, dhe shumica e njerëzve zakonisht ndjekin rregullat dhe ne zbatojmë rekomandimet e qeverisë”, tha ai.

Eduardo Cabrita, Ministri i Administratës së Brendshme të Portugalisë, tha se shtetasit portugezë treguan “frymë qytetare të patejkalueshme” në përputhje me rregullat gjatë fundjavës së Pashkëve.

“Forcat e sigurisë raportojnë nivele shumë të ulëta të qarkullimit të qytetarëve dhe respektimin e gjerë të rekomandimeve.”

Të premten, presidenti Marcelo Rebelo de Sousa propozoi zgjatjen e bllokimit kombëtar përtej 17 prillit, deri në 1 maj.

Por, pavarësisht nga shenjat premtuese, zyrtarët paralajmërojnë se mund të jetë ende herët për të vlerësuar reagimin e Portugalisë ndaj koronavirusit.

Autoritetet kanë frikë se sëmundja mund të përhapet me shpejtësi nëpër shtëpi kujdesi siç ka ndodhur në pjesët e tjera të Evropës.

Por Portugalia ka ndërmarrë hapa të mëdha për të përmirësuar virusin, duke riatdhesuar rreth 4,000 qytetarë nga jashtë.

Qeveria portugeze gjithashtu u ka dhënë të drejta të shtetësisë migrantëve dhe azilkërkuesve që kanë aplikime për qëndrim në shqyrtim.

Masa kishte për qëllim të sigurojë më shumë njerëz në vend që të mund të kenë qasje në sigurimet shoqërore dhe kujdesin shëndetësor.