Kryeministri Edi Rama ishte dje në Stamboll, ku zhvilloi një takim me presidentin turk Rexhep Taip Erdogan.
Dy liderët u dukën të dy të qetë dhe shumë miqësorë me njëri tjetrin, ndërsa ndanë në një konferencë për shtyp, ato se çfarë diskutuan në gati tre orë takim.
“Takimi me Erdogan zgjati rreth 3 orë. Folëm për shumë gjëra në të gjitha aspektet. Kemi të gjitha çadrat e nevojshme kanë filluar të instalohen, të tjerat nisen sot. Për banesat ka filluar puna, po përcaktojmë vendet. Ndihma ka qenë e gjithë anshme, nuk flasim vetëm për çadra kanë ardhur dhe njerëz, jo vetëm gjëra materiale”, tha Rama.
Ndërsa Erdogan u shpreh: “Do jemi në kontakt me ministren e Kulturës në Shqipëri që të diskutojmë për pjesën e rindërtimit. Do të diskutojmë sërish edhe me kryeministrin Rama për këtë pjesën e ndërtimeve. Do tu tregojmë shokëve tanë që janë atje edhe për ndërtimet, disa prej tyre do jenë më bazë çeliku. Mendoj që brenda 6 muajve maksimumi deri në një vit ndërtesat do jenë kryer. Për shkak të dimrit do dërgojmë çadra specifikisht për dimër për të gjithë ata që janë pa shtëpi”, deklaroi Erdogan për Top Channel.
