Pas vendimit të Qëndron Kastratit si kryetar i Kamenicës, që të mbyllë disa shkolla që kanë shumë pak nxënës, e ata t’i transferojë në shkolla të tjera të kësaj komune, SBAShk, mbajti protestë sot në këtë komunë.
Pas kësaj proteste ka reaguar i pari i Kamenicës Qëndron Kastrati, i cili i ka sqaruar SBAShK-ut, arsyen e mbylljes së shkollave.
Kastrati përmes një shkrimi në rrjetin social Facebook, ka thënë se ato kanë qenë jofunksionale dhe kanë pasur më pak se pesë nxënës.
“Në kushte normale do të prisnim që Sindikata të interesohej për mbrojtjen e të drejtave të punëtorëve. Vetëm për këtë gjë nuk duan të flasin as të dëgjojnë. SBAShK-u po flet për mbyllje shkollash, për ta përdorur një parrullë kundër një shpjegimi. Riorganizimi i shkollave mundëson standardin e cilësisë sepse i nxjerrë nxënësit nga vetmia, duke mundësuar shoqërizim, punë në grupe e autonomi për ta”, ka shkruar ai.
Sipas Kastratit, SBAShK-ut nuk po i intereson që në më shumë se gjysmën e shkollave të kësaj komune klasa e parë i ka më pak se 5 nxënës.
“SBAShK nuk po tregon që oferta jonë për mësimdhënësit i tejkalon edhe kërkesat që vetë sindikata i ka pasur dikur. SBAShK nuk do t’ia dijë që 40 përqind e shkollave nuk kanë mjedis higjienik; 8 prej tyre nuk kanë toalete funksionale; gjysma e shkollave nuk kanë kabinete të informatikës; vetëm 3 shkolla kanë kabinete profesionale; 24 nga 29 shkollat nuk kanë salla sportive të brendshme; 10 shkolla nuk kanë hapësira rekreative; 8 shkolla nuk kanë qasje të drejtpërdrejtë në rrugë; dhe asnjë shkollë nuk ka qasje për nxënësit me nevoja të veçanta përveç shkollës në Strezoc, ku kemi një improvizim të përkohshëm”, është shprehur ai.
Ai ka thënë tutje se Komuna e Kamenicës i ka vetëm 30 mijë euro buxhet për investime kapitale në arsim.
“Jam kurreshtar për të mësuar nga z. Rrahman Jasharaj se si mund të mbahen 29 objektet shkollore që janë në gjendje të mjerueshme me këtë buxhet. Unë i kam parë këto kushte, i kam pare edhe mësuesit me 5 nxënës e 2 ditarë, njërin për klasën e parë, tjetrin për të katërtën”, ka theksuar Kastrati.
Ai në fund ka thënë se SBAShK-u është vënë në mbrojtje të interesave klienteliste që e kanë sjellë arsimin në këtë gjendje.
“Edhe si mënyrë edhe si qëndrim ai është në linjën e pushtetit të deritashëm. Shkollën e sheh si objekt, kurse arsimin thjesht si vend pune, pa e vrarë mendjen për cilësinë, dijen e zhvillimin.
Ligjet në Kosovë tregojnë qartë fushëveprimin dhe përgjegjësinë e secilit institucion të arsimit. Mbi mbarëvajtjen e procesit mësimor, apo themelimin e institucioneve arsimore parauniversitare është përgjegjëse komuna. Mjafton të konsultohet Ligji mbi Vetëqeverisjen Lokale, Ligji mbi Arsimin në Komuna dhe Ligji për Arsimin Parauniversitar. Së fundi KMDLNJ, por edhe insitucionet përgjegjëse ia kanë bërë të qartë SBASHK-ut se ndërhyrja e tyre ka motive politike, ka karakter shantzhues dhe është e kundërligjshme. KMDLNJ tregoi se çështja në fjalë është përgjegjësi eksluzive e Komunës së Kamenicës duke akuzuar SBAShK-un për keqpërdorim të mësimdhënësve dhe nxënësve. Por, Sindikata jonë ka marrë krye për të vendosur gjithçka. Sërish, ky nuk është problemi kryesor. Principata SBAShK kërkon sovranitet për ta mbrojtur status-quon. Kamenica nuk do të jetë territori i hyqmit të saj’’, ka përfunduar kryetari i Kamenicës. / Insajderi.com
