Ministria e Financave ka njoftuar se janë përmbyllur negociatat për marrëveshjen financiare ndërkombëtare (kredi koncesionare) për Projektin për Patundshmëri dhe Infrastrukturë Gjeo-hapësinore (REGIP) me Bankën Botërore, në vlerë prej 14.6 milionë euro.
“Ky projekt ka për qëllim rritjen e cilësisë së administrimit të tokës, të dhënave si dhe shërbimeve gjeo-hapësinore, rindërtimin e kadastrave si dhe rritjen e transparencës përmes qasjes në këto të dhëna për të gjitha zonat kadastrale në Kosovë, përmes platformave të ndryshme elektronike, duke kontribuar kështu drejtpërdrejt në ekonominë e vendit dhe tregut të patundshmërive”, thuhet në njoftimin e Ministrisë së Financave.
Ekipi Negociator për Projektin për Patundshmëri dhe Infrastrukturë Gjeo-hapësinore (REGIP), është themeluar me vendim të ministrit të Financave, ndërsa është kryesuar nga Drejtori i Përgjithshëm i Thesarit në Ministrinë e Financave, Ahmet Ismaili.
Ky ekip është përbërë nga përfaqësuesit e disa institucioneve qeveritare, duke përfshirë edhe Agjencinë Kadastrale të Kosovës.
