Hetimi për procedurën e shkarkimit të presidentit Donald Trump, u intensifikua të mërkurën ndërsa ligjvënësit u kthyen në Uashington pas një pushimi dyjavor. Ish- zyrtarë të administratës së Presidentit Trump kanë dëshmuar me dyer të mbyllura në Kongres gjatë gjithë javës, ndërsa demokratët vazhdojnë të mbledhin të dhëna për argumentin e tyre se zoti Trump kishte bërë përpjekje për ndërhyrje të huaj në zgjedhjet e vitit 2020.
Ishte një javë e ngarkuar me intervista për demokratët e Dhomës së Përfaqësuesve që po mbledhin të dhëna për procedurën e shkarkimit, shkruan Zëri i Amerikës.
“Nuk besoj që kemi arritur deri atje. Kemi akoma shumë gjëra për të bërë. Dhe po i bëjmë”, tha Eliot Engel, Kryetar i Komisionit për Marrëdhënie me Jashtë.
Sipas ankesës së informatorit, presidenti e bllokoi ndihmën ndaj Ukrainës në këmbim të ndihmës kundër rivalit të tij, Joe Biden dhe të birit të tij, duke bërë që kreu i Komisionit të Zbulimit, Adam Schiff të kërkonte urdhra gjykate për të marrë më shumë informacion, që deri tani administrata e zotit Traump, i ka refuzuar.
“Argumentet për pengim të drejtësisë po shtohen”, tha ai.
Presidenti Trump po argumenton se nuk do të bashkëpunojë deri kur demokratët e Dhomës së Përfaqësuesve të mbajnë një votim për ta zyrtarizuar hetimin. Kryetarja Nancy Pelosi thotë se kjo është një lojë për të sabotuar kongresin:
“Ne nuk jemi këtu për të luajtur. Jemi këtu për të gjetur të vërtetën, për të mbrojtur Kushtetutën e Shteteve të Bashkuara”, tha zonja Pelosi.
Por presidenti tha se zonja Pelosi dhe demokratët po bëjnë lojëra politike:
“Është një çmenduri e vërtetë. Mjafton të lexoni transkriptin e telefonatës. Është rast shumë i thjeshtë. Ata janë të dëshpëruar sepse e dinë që do t’i humbin zgjedhjet”.
Zoti Schiff, që ka nervozuar republikanët, përballet me një votë pakënaqësie nga një nga aleatët e zotit Trump në Kongres.
Kevin McCarthy, udhëheqës i Pakicës në Dhomën e Përfaqësuesve: “Nuk ka asgjë që të justifikojë procedurën e shkarkimit në atë telefonatë. Dhe nëse kryetarja e Dhomës së Përfaqësuesve do të kishte pritur 48 orë për transkriptin, Amerika nuk kishte pse të përjetonte këtë gjë”.
Demokratët përballen me presionin për të mbajtur një votim për procedurën e shkarkimit deri në fund të vitit, në mënyrë që të bëhet para fillimit zyrtar të fushatës presidenciale. Megjithatë disa thonë se kjo nuk përbën shqetësim.
