Njerëzit e hershëm që kanë jetuar në ishullin e Sri Lankës 48,000 vjet më parë, kishin punuar veglat e tyre nga eshtërat e kafshëve dhe i përdornin ato për të gjuajtur majmunë dhe ketër, thotë një studim i ri, raporton CNN, transmeton Insajderi.
Gjetjet e reja janë prova se njerëzit edhe jashtë Afrikës, kishin përdorur harkun e shigjetën si mjete për gjah dhe njëkohësisht, janë artefaktet më të vjetra në botë, përjashtuar kontinentin afrikan, që dëshmojnë përdorimin e kësaj teknologjie në gjuajtjen e kafshëve.
Vitin e kaluar, studiuesit kishin inicuar një studim për të analizuar eshtërat e majmunëve dhe ketërve të gjetura në shpellën Fa-Hien Lena në këtë ishull; studimi dëshmon se njerëzit, i kishin gjuajtur kafshët e lartëpërmendura. Kjo shpellë është po ashtu edhe vendndodhja e fosilit më të kershëm të Homo Sapiensit në Azinë Jugore. Njerëzit e kishin okupuar këtë zonë përgjatë katër periudhave të ndryshme mes 4,000 dhe 48,000 vjet më parë.
Disa nga eshtrat e gjetura në këtë shpellë janë modifikuar në formë të mjeteve për gjah, kështuqë studiuesit i kanë analizuar ato për të huptuar se sa herët paraardhësit tanë kishin mësuar që të gjuanin kafshë të vogla e të shpejta nëpër pyje.
Ky studim është publikuar të premten që lamë pas në revistën shkencore “Science Advances”.
Studimi i ri, hedh poshtë pretendimet se teknologjia e harkut e shigjetës në Europë është e dyta më e vjetra pas Afrikës. Në Europë sipas shkencës, vegla të tilla datojnë prej 20 mijë vitesh më parë, ndërsa këto në Sri Lankë, prej 48,000 vitesh. /Insajderi.com
