Presidenti i Kosovës, Hashim Thaçi, mbrëmë përmes Twitterit shpërndau lajmin se shteti i Xhamajkës e njohu Pavarësinë e Kosovës. Njohjen e paralajmëroi pas pasur asnjë notë verbale nga ky shtet.
Thaçi në fakt me këtë veprim shpërndau një fake news, me të cilin arriti të mashtrojë popullin dhe liderët e insitucioneve, shkruan Insajderi.
Ministrja e Jashtme e Xhamajkës, Kamina Smith reagoi mëngjesin e sotëm në Twitter duke thënë se vendi i saj nuk e ka njohur Kosovën.
“Deri më sot, Xhamajka nuk e ka njohur Kosovën si shtet të pavarur”, shkroi ajo duke iu përgjigjur presidentit Hashim Thaçi.
Pre e kësaj kurthe ranë edhe zyrtarët e lartë të institucioneve përfshirë Kryeministrin, Kryeparlamentaren, Ministrin e Jashtëm e deputetët.
Kryetarja e Kuvendit, Vjosa Osmani reagoj menjëherë duke falënderuar kryeministrin e Xhamajkës, Andrew Holness, kryetarin e Kuvendit të Xhamajkës, Pearnel Charles dhe kongresistin amerikan Eliot Engel.
“Faleminderit kryeministrit Holness, kryetarit të Kuvendit Charles, për njohjen e Kosovës. Pa dyshuar aspak, vendimi i juaj është vendim i duhur. “Zoti i bekoftë dy shtetet tona”, kishte shkruar Osmani.
Pas saj reagoi edhe ministri i MPJ-së, Glauk Konjufca i cili po ashtu kishte fjalë të mira për shtetin e Xhamajkës, duke shprehur mirënjohjet më të larta.
“Shpreh mirënjohjen më të lartë qeverisë dhe popullit të Xhamaikës për vendimin miqësor e shumë të mirëpritur për njohjen e Republikës së Kosovës. Njohja e Republikës së Kosovës është një moment i veçantë i miqësisë në mes të vendeve tona. Qeveria e Republikës së Kosovës do të përcjellë, përmes kanaleve diplomatike, gatishmërinë për të inicuar lidhjen e marrëdhënieve diplomatike në mes të dy vendeve tona dhe për të thelluar miqësinë dhe bashkëpunimin në mes të dy shteteve dhe popujve tanë”, kishte shkruar Konjufca.
Pre e këtij lajmi ra edhe kryeministri i Kosovës, Albin Kurti. Ai madje i mori edhe meritat për njohjen e Xhamajkës duke shkruar një fillimi i mbarë për qeverinë e re.
“Një vend i rëndësishëm i Karaibeve dhe një pjesë e rëndësishme e Kombeve të Komonuelthit njohën zyrtarisht Republikën e Kosova. Një fillim i mbarë i vitit 2020 për diplomacinë e Kosovës dhe qeverinë e re. Dua të falënderoj njerëzit dhe qeverinë e Xhamajkës si dhe kryeministrin, Andreë Holness. Mezi pres që të bashkëpunojmë dhe t’i tregojmë mirënjohjen e Kosovës në çdo mundësi të ardhshme”. kishte shkruar Kurti./Insajderi.com
Shiko edhe:
