Ka dështuar të miratohet propozim-rezoluta e Lëvizjes Vetëvendosje për personat e pagjetur, njofton Insajderi.
Në mungesë kuorumi, vetëm 31 deputetë të kësaj partie kanë votuar pro këtij projekt-rezolute, ndërsa grupet e tjera parlamentare janë përmbajtur nga votimi.
Përveç kësaj, deputetët dështuan të miratojnë edhe të gjitha projektligjet tjera që ishin në rend të ditës.
Ndërkohë, ushtruesi i detyrës së shefit të grupit parlamentar të Lëvizjes Vetëvendosje, Liburn Aliu edhe nga foltorja e Kuvendit kërkoi shkarkimin e zëvendëskryeministrit Driton Selmanajt për deklaratat e tij për të pagjeturit.
Në mungesë të kuorumit nuk u miratuan në parim Projektligji për të drejtën ndërkombëtare private, ai për Këshillim Ekonomiko-Social, Inspektoratin e Punës.
Krahas këtyre nuk pati vota as për Projektligjin për identifikimin elektronik dhe shërbimet e besuara në transaksionet elektronike dhe Projektligjin për plotësim-ndryshimet e Ligjit për zgjedhje.
Deputetët në mbledhjen e sotme i vazhduan edhe për tre muaj mandatin Komisionit Hetimor për Hidrocentrale mbi procesin e licencimit, operimit, mbikëqyrjes dhe aplikimit për lejet e hidrocentraleve në Kosovë. /Insajderi.com
