Teksa Kosova nuk arriti sot të bëhej vend anëtar i INTERPOL-it, pasi që nuk mori shumicën e nevojshme prej dy të tretave të votave të vendeve pjesëmarrëse të kësaj organizate, nesër në Asamblenë e Përgjithshme të INTERPOL-it do të votohet për kreun e ri të kësaj organizate.
Pikërisht të mërkurën në INTERPOL mund të rrisë pushtetin presidenti rus, Vladimir Putin, pasi një zyrtar i qeverisë së tij, Aleksandr Prokopchuk është kandidat serioz për t’u zgjedhur në krye të INTERPOL-it.
E për këtë ngjarje janë mobilizuar shtetet demokratike perëndimore për të refuzuar zgjedhjet e Prokopchuk në krye të INTERPOL-it, mbi frikën se Moska mund të abuzojë me këtë rol dhe t’i kundërvihet kundërshtarëve të saj politik, raporton Newsweek.
Kremlini ka mohuar “ndërhyrjet” e mundshme në votimin i cili është vendosur për të mërkurën në mbylljen e konferencës vjetore të Interpolit në Dubai, shkruan Insajderi.
Madje një shtet i botës demokratike po konsideron largimin nga INTERPOL-i. Lituania është shteti fqinj i Rusisë, i cili po konsideron daljen nga INTERPOL-i, nëse në krye të kësaj organizate vjen Aleksandr Prokopchuk.
Parlamenti i Lituanisë ka miratuar sot një rezolutë që thekson se Lituania do largohet nga INTERPOL-i nëse në krye të organizatës zgjedhet Prokopchuk.
Me 88 vota për dhe asnjë kundër, Parlamenti i Lituanisë votoi rezolutën, e cila e konsideron Aleksandr Prokopchukun një person jo të denjë për pozitën e kreut të INTERPOL-it.