Në qoftë se do të na duhej të zgjidhnim pjatën të cilën mund ta hamë (do ishte akoma më mirë n.q.s na e përgatisin të tjerët) çdo ditë pa u velur, e sigurisht që do të ishin makaronat. Italianët janë shumë me fat që i kanë pjesë të kulinarisë së tyre, por as ne nuk ngelemi më pas, pasi prej shumë vitesh janë kthyer në një nga ushqimet kryesore të ditës. Linda i ka qarë këtë radhë, provojini edhe ju dhe s’do të zhgënjeheni.
PËRBËRËSIT PËR 3-4 PERSONA: 300 g makarona jufka, 400-500 g karkaleca të qëruar – të freskët akoma më mirë, lëngu i 1/2 limoni organik dhe lëkura e grirë në rende, majdanoz i freskët i grirë, 2-3 lugë gjalpë, 2 thelpinj hudhër të shtypur mirë, 2-3 lugë verë të bardhë, pana ose lëng perimesh , pak borzilok kripë e piper sipas nevojës.
PËRGATITJA: Në një tigan, skuqim karkalecat me 1 lugë gjalpë. I heqim dhe i lëmë mënjanë. Shtojmë në tigan gjalpin që na ka mbetur bashkë me hudhrën pluhur. I përziejmë për 1 minutë me lugë druri dhe në nxehtësi të ulët, derisa gjalpi të marrë aromën e hudhrës. Shtojmë më pas verën, borzilokun dhe majdanozin, lëngun dhe lëkurën e limonit. Shtojmë karkalecat që kishim lënë mënjanë dhe e lëmë në zjarr për 2 minuta. Vëmë jufkat të ziejnë sipas minutave që shkruhen në paketimin e tyre. I kullojmë dhe i hedhim në tiganin ku kemi karkalecat. I shërbejmë menjëherë.
