Një infermier në Spitalin e Prizrenit është sulmuar fizikisht të martën në vendin e punës, transmeton Insajderi.
Kryetar i Sindikatës së Spitalit në Prizren, Shkëlzen Krasniqi, e ka konfirmuar rastin teksa ka njoftuar se sulmi fizik është bërë nga babai i një pacienti.
Sipas Krasniqit, infermieri është sulmuar pa ndonjë arsye.
“Pacienti ka ardhur me një udhëzim pa emër e mbiemër dhe pa shënime përkatëse për të bërë një radiografi. Kjo ka qenë arsyeja e vetme pse infermieri ka kërkuar që t’i jepen shënimet personale. Kurse përcjellësi, babai i pacientit i ka thënë “këqyr kryeje t’i punën e mos kërko shënime tjera dhe mandej papritur e ka sulmuar fizikisht duke e goditur ne pjesën e syrit infermierin “, ka thënë ai për PrizrenPress.
Ndërsa, zëdhënësi i Policisë në Prizren, Shaban Osmanollaj, e ka konfirmuar sulmin fizik ndaj infermierit të Spitalit të Prizrenit.
Ai ka treguar se sulmuesi është arrestuar./Insajderi.com
