Pas vënies së zjarrit në një xhami turke në Ulm të Gjermanisë, policia ka arrestuar katër shtetas sirianë nën dyshim se ata janë autorët. Ndaj tyre do të hetohet për veprat penale “përpjekje për vrasje” dhe “përpjekje për zjarrëvënie të rëndë”.
Nën dyshimin se kanë hedhur fishekzjarre në drejtim të xhamisë, katër shtetasit sirianë janë arrestuar si autorë të veprës. Për shkak të dyshimit se vepra është kryer mbi baza politike, rasti do t’i dorëzohet Prokurorisë për raste të rënda në Shtutgart, përcjell albinfo.ch.
Njëri nga të akuzuarit e ka pranuar veprën. Dy nga të arrestuarit janë të moshës 18-vjeçare, ndërsa dy të tjerët të moshës 24 dhe 27-vjeçare.
Me vendbanim në Ulm, Alb-Donau, Ravensburg dhe Neu-Ulm (Bavari), sipas komunikatës policore ata janë arrestuar të mërkurën.
Me kërkesë të Prokurorisë, gjykatësi gjerman të enjten ka lëshuar urdhërarrest, njofton më tej albinfo.ch. Hetuesit nuk kanë dashur të prononcohen nëse vepra është kryer si hakmarrje ndaj intervenimit ushtarak turk në Afrin të Sirisë kundër kurdëve.
Sipas hetimeve të deritanishme, natën e 19 marsit është hedhur një fishekzjarr në xhami, ku ka pasur tetë persona duke u lutur. Në afërsi gjithashtu janë gjetur edhe disa fishekzjarre të tjerë.
