Presidenti i Shteteve të Bashkuara të Amerikës, Donald Trump, tha këtë të enjte se ushtria amerikane ka shkatërruar një dron i cili kontrollohej nga Irani, duke e arsyetuar vendimin e tij për shkak të “veprimeve provokatore”.
Ngjarja ka ndodhur në ngushticën e Hormuzit, e vetmja lidhje mes Gjirit Persik dhe oqeanit. Rreth një e pesta e naftës së botës kalon në këtë ngushticë.
Trump tha në Shtëpinë e Bardhë, që ushtria amerikane ka bërë një “aksion mbrojtës” për shkak se droni qëndronte në distancë më të vogël se 1.000 metra.
“Droni u shkatërrua menjëherë” tha ai, pasi që operatorët injoruan “paralajmërimet e shumta për t’u kthyer mbrapa”.
Presidenti e quajti incidentin “më të fundit nga disa aksione të ndryshme provokatore nga Irani”.
Trump e bëri këtë njoftim të enjten gjatë një ceremonie në Shtëpinë e Bardhë, që ishte për rikthimin e flamurit amerikan që valoi në Francë kur u mposhtën nazistët në Normandi.
