Profesori i Ekonomisë, Nuri Bashota, ka ndërruar jetë, njofton Insajderi.
Ceremonia e varrimit do të organizohet të mërkurën e 30 dhjetorit nga ora 13:00, në varrezat e qytetit, Gjakovë.
Biografia e tij
Prof. Dr. Nuri H. Bashota lindi më 8 dhjetor 1933 në Gjakovë ku kreu shkollën fillore dhe gjimnazin e ulët, ndërsa Gjimnazin Real Shqiptar në Prishtinë.
Në vitin 1960 u diplomua në Fakultetin Ekonomik të Universitetit të Beogradit. Njëherësh, gjatë viteve 1963-1964 përfundoi studimet postdiplomike (Troisieme Cycle) në Universitetin e Parisit – Sorbonë, si bursist i OECD-së. Në vitin 1974 doktoroi nga shkencat ekonomike në Universitetin e Zagrebit.
Bashota ishte një ndër themeluesit e Fakultetit Ekonomik të Prishtinës në të cilin punoi 40 vjet, nga u pensionua si Profesor Emeritus.
Së fundi ishte Kryetar i Bordit të Universitetit “ILIRIA” në Prishtinë dhe anëtar i Këshillit Kombëtar për Shkencë pranë MASHT-it të Kosovës.
Gjatë punës së tij shumëvjeçare, kreu shumë detyra me rëndësi mësimore-shkencore: Dekan i Fakultetit Ekonomik, Drejtor i Entit për Kërkime Shoqërore-Ekonomike të Fakultetit Juridik-Ekonomik, Kryetar i Lidhjes së Ekonomistëve të Kosovës, Nënkryetar i Unionit të Ekonomistëve Shqipëtar në Tiranë, Nënkryetar i Seksionit Shkencor të Lidhjes së Ekonomistëve të ishJugosllavisë, Kryetar i Këshillit Botues të revistës “Përparimi”, Kryeredaktor i revistës shkencore “Economia”, të revistës shkencore ndërkombëtare “ILIRIA”, të revistës shkencor “Universum Jurnal” etj.
Prof. Dr. Nuri H. Bashota është autor i më se 150 punimeve shkencore e profesionale të publikuara në gjuhën shqipe dhe në gjuhë të huaja, si dhe i 18 projekteve të aplikuara shkencore dhe 8 teksteve universitare nga lëmi i shkencave ekonomike. Njëherësh, ai dha një kontribut të veçantë në hartimin e këtyre dokumenteve të rëndësishme: Koncepcioni dhe strategjia e zhvillimit shoqëroro-ekonomik afatgjatë të Kosovës 1975-1985 dhe 1985-2000 si dhe të Politikës ekonomike të Kosovës, në të cilat dokumente është mbështetur zhvillimi ekonomik i Kosovës në të kaluarën.
Me punën e tij të frytshme shumëvjeçare shkencore dhe pedagogjike la gjurmë të pashlyeshme, si në krijimin e kuadrit të ri profesional-shkencor ashtu edhe në zhvillimin ekonomik të Kosovës gjatë periudhës së kaluar. Për këtë dëshmojnë mirënjohjet me të cilat është nderuar nga institucionet e vendit dhe ato ndërkombëtare.
Kujtojmë që vitin e kaluar, Prof. Dr. Nuri Bashota nga Kryetari i Komunës, Ardian Gjini është shpallur “Nderi i Gjakovës”. /Insajderi.com
