Nënkryetari i PSD-së dhe deputeti i Kuvendit, Visar Ymeri, i ka bërë thirrje presidentit të Serbisë, Aleksandër Vuciq, që mos ta kopjojë Sllobodan Millosheviqin, por të vijë në dialog për t’i mbrojtur interesat e serbëve të Kosovës.
Përmes një shkrimi të tij, Ymeri ia ka kujtuar Vuçiqit protestat në Serbi. Duke thënë se protestat ndaj tij, po e tregojnë fuqinë dhe politikën që po e bën kreu i shtetit serb.
Shkrimi i plotë i Visar Ymerit:
“NË VEND SE TA KOPJOJË MILLOSHEVIQIN, VUÇIQI LE TË VJEN NË DIALOG PËR TA TRAJTUAR ÇËSHTJEN E MINORITETEVE NË SERBI
Presidenti i Serbisë, Aleksandër Vuçiqi vazhdon të synojë të bëhet kopje e Sllobodan Millosheviqit. Pasi e glorifikoi atë si “lider të madh me qëllime të mira dhe rezultate të dobëta”, tash përdorë deklaratën e tij të Fushë-Kosovës në vitin 1987, ku Millosheviqi iu kishte thënë serbëve: “Askush nuk guxon t’ju rrahë”.
Të gjithë qytetarët e Kosovës pavarësisht emrit që mbajnë, gjuhës që flasin e religjionit që e besojnë, janë të barabartë e gëzojnë të drejta të barabarta. Republika e Kosovës nuk do të përndjekë por do të përfshijë e integrojë.
Në vend se të synojë rezultate më të mira me idetë dhe veprimet e Sllobodan Millosheviqit duke keqpërdorur serbët e Kosovës, Aleksandër Vuçiqi le të dëshmohet në demokratizimin dhe respektimin e të drejtave të njeriut dhe minoriteteve brenda Republikës së Serbisë, duke filluar nga plotësimi i kritereve të Bashkimit Evropian për anëtarësimin e Serbisë (sidomos kapitujt 23 dhe 24) dhe jetësimin e tri marrëveshjeve që i ka firmosur Qeveria e Serbisë për Luginën e Preshevës, me prani ndërkombëtare.
Protestat nëpër Serbi dhe të gjitha të dhënat e organizatave të besueshme për të drejtat e njeriut po flasin mjaftueshëm për pushtetin e tij.
Në vend se t’i vajtojë dhe t’i keqpërdorë serbët e Kosovës për interesat e pushtetit të tij në Beograd, Aleksandër Vuçiqi të vjen në tavolinën e negociatave në Bruksel, për ta trajtuar gjendjen dhe pozitën e të drejtave të njeriut dhe minoriteteve. Le ta krahasojmë aty pozitën kushtetuese dhe ligjore, si dhe gjendjen shoqërore, të minoriteteve në Serbi dhe në Kosovë. Të serbëve në Kosovë dhe të shqiptarëve në Serbi”./ Insajderi.com
