Ministri në detyrë i Shëndetësisë, Armend Zemaj, ka paralajmëruar vendosjen e një takes pë rata që kërkojnë teste PCR për udhëtime jashtë vendit për komercializëm apo dëshirë, njofton Insajderi.
Zemaj thotë se në vendet prej nga ata vijnë, minimumi i ditëve që duhet të presin për të bërë një test PCR për udhëtim jashtë vendit është pesë ditë dhe se duhet të paguajnë 170 deri në 300 euro, derisa në Kosovë këto teste i marrin falas në IKSHP.
“Në vendet e perëndimi prej nga vijnë ata minimum i ditëve që mund ta bëjnë një test është 5 ditë, dmth mund të ketë edhe në 10 ditë pritje. Pothuajse 70 përqind të bashkatdhetarëve i marin testet falas në IKSHP, që bëhen nga taksat tona dhe i shfrytëzojnë për udhëtime jashtë vendit. Ata që e bëjnë një test të tillë në shtetet e perëndimit paguajnë 170 euro deri në 300 euro për test për të ardh apo shkuar në ndonjë vend tjetër”, është shprehur Zemaj në ‘Kanal10’.
I pari i Shëndetësisë ka paralajmëruar vendosjen e një takse për ata që kërkojnë teste për të udhëtuar për komercializëm ose dëshirë.
“Me qenë transparent, javën e kaluar me propozim të Institutit dhe Departamentit të Mikrobiologjisë kemi autorizu zyrën ligjore që edhe ne mund të fusim një taksë për ata që udhëtojnë për komercializëm ose dëshirë, jo këta që kanë nevoja të shëndetit apo nevoja emergjente, që të shohim edhe ne ta adaptojmë një taksë sepse jemi bombardu me kërkesa për testime për udhëtime jashtë vendit dhe e cila ka kosto shumë të madhe. Cdo ditë bëhen mbi 2 mijë e 500 teste, një pjesë e të cilave për udhëtime jashtë vendit…”, ka thënë Zemaj. /Insajderi.com
