Për rreth katër orë sot Prokuroria Speciale e Kosovës e intervistoi kryetarin e NISMA-s për Kosovën, Fatmir Limaj, si dyshuar kryesor në vrasjen e dy civilëve shqiptarë më 2 tetor të vitit 1998, sipas Limajt, kanë qenë orët kur ai i ka ndihmuar drejtësisë.
Fatmir Limaj, i njohur si komandant Çeliku, dyshohet se ka dorë në ekzekutimin pa gjyq të Ramiz Hoxhës nga Bellanica dhe Selman Binishit nga Banja. Aso kohe Limaj ishte komandant i zonës.
Me të dalë nga objekti i Prokurorisë Speciale, i shoqëruar nga avokati i tij, Tahir Rrecaj, lideri i NISMA-s tha se ai është i gatshëm të jap ndihmën e tij në zbardhjen e drejtësisë së këtij rasti.
“Kemi qenë të ftuar nga Prokuroria për të sqaruar një rast nga lufta çlirimtare. Nga deklarimet e mija shpresoj që ta kem ndihmuar drejtësinë dhe shpresoj që fajtorët të dalin para drejtësisë”, deklaroi ish-komandanti i UCK-së.
Hetim i ri kundër Fatmir Limajt – dyshohet për vrasjen e dy civilëve shqiptarë
Ramiz Hoxha, ishte pushkatuar nga pjesëtarë të Ushtrisë Çlirimtare të Kosovës, më 2 tetor 1998. Atij i ishte prerë edhe koka. Përgjegjësinë për vrasjen e tij e kishte marrë Shtabi i Përgjithshëm i UÇK-së me komunikatën numër 4.
Po atë ditë ishte pushkatuar nga e njëjta skuadër edhe i riu Selman Binishi. Arsyeja pse ishte vrarë, dyshohet se ishte fakti se ai u kishte thënë ushtarëve të maskuar të UÇK-së, se e dinte se po i njihte se kush janë ata.
Skuadra, e kishte futur në bagazh të veturës duke e dërguar në një mal dhe duke e pushkatuar së bashku me Ramiz Hoxhën./Insajderi.com
