Arrestohet personi i parë që nuk ofroi ndihmë për të vdekurin në Gjilan

Vdekja e një të moshuari midis rrugës në Gjilan i cili shokoi opinionin për shkak të mungesës së dhënies së ndihmës nga kalimtarët me vetura të cilët vetëm e shikonin viktimën pa u ndalur askush.

Por ata që nuk u ndalën për të dhënë ndihmën për të moshuarin nuk do të kalojnë pa u identifikuar dhe ndëshkuar.

E i dyshuari i parë tashmë është arrestuar.  Për Insajderin, prokurori i cështjes, Agron Uka, ka treguar se prokuroria ka përparuar në hetimet për zbardhjen e rastit, përkundër sfidave që paraqiten për identifikimin e veturave të cilat kanë kaluar dhe nuk janë ndalur pranë trupit të viktimës dhe duke mos i ofruar ndihmë.

Kësisoj me urdhër të prokurorit Agron Uka është arrestuar një i dyshuar i cili është nga Gjilani.

I arrestuari është F.M nga Gjilani i lindur në vitin 1991 dhe ka qenë shoferi i veturës së katërt e cila sipas videos shihet që parakalon me një kamionetë.

“I dyshuari është identifikuar përmes disa shenjave dhe shkronjave specifike që i ka pasur vetura dhe pas hetimeve të ndryshme ka ardhur deri tek identifikimi i tij dhe është arrestuar e ndaluar për 48 orë”, ka thënë Uka për Insajderin.

Sipas tij, i dyshuari e ka pranuar ka qenë në veturën në fjalë dhe se nuk është ndalur të jap ndihmë, por sipas prokurorit i dyshuari nuk ka dhënë ende arsye pse s’ka ofruar ndihmë.

Uka ka treguar se i dyshuari F.M nga Gjilani është ndalur për veprën penale të mosdhënies së ndihmës, sipas Kodit Penal.

Prokurori i ka thënë Insajderit se deri tash janë intervistuar dy persona në cilësinë e dëshmitarit dhe po punohet në identifikimin e veturave që kanë parakaluar dhe nuk kanë ofruar ndihmë.

“Videot që tregojnë ngjarjen janë dërguar në Prishtinë për një hetim më të detajuar si përpjekje për të identifikuar targat e automjeteve e kësisoj edhe të dyshuarve që nuk kanë ofruar ndihmë”, ka thënë Uka për Insajderin.

Prokuroria e Gjilanit sipas tij është duke u përpjekur maksimalisht që të identifikohen edhe shoferët e tri veturave të para dhe veturave të tjera që kanë kaluar gjatë kohës sa viktima ka qenë i shtrirë në trotuar.

Viktima, një qytetar me shtetësi maqedonase vdiq si pasojë e sulmit në zemër nga nxehtësia e madhe dhe videot nga vendi i ngjarjes tregojnë për një mungesë totale të ndihmëdhënies nga kalimtarët dhe shoferët e veturave që kalojnë atypari. /Insajderi.com

Lexoni në Insajderi: “EL CHAPO” KOSOVAR QË ARRITI TË PËRFITOJË MBI 1 MILION EURO NGA TENDERËT PUBLIKË (I)